विद्यार्थ्यांची शैक्षणिक गुणवत्ता उंचावणे, शिक्षकांच्या अध्यापन पद्धतीत नावीन्यपूर्ण बदल घडवून आणणे आणि शिक्षकांना आधुनिक तंत्रज्ञानाच्या माध्यमातून अधिक सक्षम करणे, या उद्देशाने नंदुरबार जिल्हा परिषदेच्या आचार्य विनोबा भावे शिक्षक सहाय्य कार्यक्रमांतर्गत विनोबा ॲपच्या ‘पोस्ट ऑफ द मंथ’ पुरस्कारांचे वितरण करण्यात आले.
जिल्हा परिषदेत आयोजित कार्यक्रमात मुख्य कार्यकारी अधिकारी नमन गोयल यांच्या हस्ते पुरस्कारप्राप्त शिक्षकांना सन्मानपत्र आणि शैक्षणिक साहित्य किट देऊन गौरविण्यात आले. या वेळी अतिरिक्त मुख्य कार्यकारी अधिकारी चंद्रकांत पवार, प्राथमिक शिक्षणाधिकारी क्रांती आरसूड आणि विनोबा ॲपचे जिल्हा प्रोजेक्ट ऑफिसर यश पांडे उपस्थित होते.
चार शिक्षकांचा गौरव
पुरस्कारासाठी विशाल दिलीप पाटील (अजेपूर), गोपाल होनजी गावित (प्रकाशा), वृषाली राजू साळवे (भालेर) आणि सोनाली रवींद्र पाटील (नारायणपूर) यांचा समावेश आहे. या शिक्षकांनी विनोबा ॲपच्या माध्यमातून शैक्षणिक उपक्रम, अध्यापन साहित्य आणि नावीन्यपूर्ण शैक्षणिक कृतींचे प्रभावी सादरीकरण केल्याबद्दल हा सन्मान प्रदान करण्यात आला.
शिक्षकांसाठी उपयुक्त डिजिटल व्यासपीठ
शिक्षण अधिक आनंददायी, कृतिशील आणि गुणवत्तापूर्ण करण्यासाठी नंदुरबार जिल्हा परिषदेने पुणे येथील ओपन लिंक्स फाउंडेशनच्या सहकार्याने ‘विनोबा’ मोबाईल ॲप उपलब्ध केले आहे. या ॲपच्या माध्यमातून जिल्ह्यातील शिक्षकांना एकमेकांशी ऑनलाइन संवाद साधता येतो. अध्यापनातील विविध प्रयोग, नावीन्यपूर्ण शैक्षणिक कृती, अध्ययन-अध्यापन साहित्य, शैक्षणिक व्हिडिओ आणि यशस्वी उपक्रम अपलोड करता येतात. मुख्य कार्यकारी अधिकारी नमन गोयल यांनी या वेळी विनोबा ॲपचे महत्त्व सांगितले. शिक्षकांचे विविध प्रश्न आणि प्रस्ताव वेळेत मार्गी लावण्यासाठीही हे व्यासपीठ सहाय्यभूत ठरणार असल्याचे ते म्हणाले. या कार्यक्रमात विद्यार्थिनी धनश्री पाटील हिने आद्य क्रांतिकारक उमाजी नाईक यांच्याविषयी भाषण सादर केले.
स्रोत: मूळ बातमी
Leave a Reply