कोल्हापूर जिल्हा दूध उत्पादक संघ, अर्थात गोकुळच्या निवडणुकीनंतर राज्य सरकारने चार संचालकांची नियुक्ती करण्याचा निर्णय घेतला. या निर्णयामुळे विरोधकांमध्ये तीव्र नाराजी पसरली. सरकारचा हा निर्णय लोकशाहीच्या विरोधात असल्याचा आरोप करत आज कोल्हापुरात नागरिक रस्त्यावर उतरले. काँग्रेस नेते सतेज पाटील यांच्या नेतृत्वाखाली संघर्ष मोर्चा काढण्यात आला. या मोर्चात राष्ट्रवादी काँग्रेस शरदचंद्र पवार पक्षाचे ज्येष्ठ नेते जयंत पाटील यांनी सहभाग घेतला आणि सरकारवर जोरदार टीका केली. हा निर्णय तातडीने मागे घ्यावा, अन्यथा त्याचे गंभीर परिणाम भोगावे लागतील, असा इशारा त्यांनी दिला.
लोकशाहीची मूल्ये धोक्यात असल्याचा आरोप
जयंत पाटील म्हणाले की, आजपर्यंत लोकशाहीचा आदर राखून देशात लोकशाही चालत आली आहे आणि त्याच तत्त्वावर देशातील सहकारी संस्था कार्यरत आहेत. सहकारी संस्थांमध्ये तज्ज्ञ संचालकांची संख्या दोनपेक्षा जास्त नसावी, असा शिरस्ता आहे. मात्र महाराष्ट्राच्या सहकार क्षेत्रात पहिल्यांदाच असा प्रकार पाहायला मिळत असल्याचे ते म्हणाले. लोकशाहीची सर्व मूल्ये बाजूला सारण्याचे काम या सरकारच्या काळात झाले आहे, असा आरोप त्यांनी केला. न्यायालयाचा निकालही आपण लावू शकतो, अशी वल्गणा करणारे लोक सत्तेच्या बाजूला आहेत, असेही ते म्हणाले.
देशात न्याय आहे का, असा सवाल उपस्थित करत पाटील म्हणाले की, न्याय नसेल तर लोक रस्त्यावर उतरतील, हे सत्ताधाऱ्यांनी लक्षात ठेवावे. मुख्यमंत्री देवेंद्र फडणवीस यांची अशी इच्छा नाही, असे आपण आजही मानतो, असे ते म्हणाले. मात्र फडणवीस यांना लोकशाही राखायची असती तर ते सहकाऱ्यांच्या दबावाला बळी पडले नसते, असेही त्यांनी नमूद केले. हा निर्णय केवळ गोकुळपुरता मर्यादित समजू नये; लोकशाही मूल्यांवर विश्वास ठेवणाऱ्या प्रत्येक मतदाराशी हा निर्णय संबंधित आहे, असे पाटील म्हणाले.
महायुतीच्या संचालकांबाबत मोठा दावा
जयंत पाटील यांनी यावेळी एक मोठा दावाही केला. महायुतीच्या काही संचालकांनी आपल्याशी चर्चा केल्याचे त्यांनी सांगितले. सत्ताधाऱ्यांना भीती आहे की, त्यांचे १२ संचालक आत गेले तर ते त्यांचेच राहणार नाहीत. ते आत येऊन समोर बसले तर दुसऱ्या-तिसऱ्या बैठकीनंतर बंटी पाटील यांचे १७ होतील, असे पाटील म्हणाले. तिकडेही हे चाललेले बरे नाही, असे मानणारी मंडळी असल्याचे त्यांनी सांगितले. आम्हाला आमच्यातच जाऊ दिले जात नाही, असे ते संचालक म्हणत असल्याचा दावा पाटील यांनी केला.
न्यायालयाने २५ जणांबाबत निर्णय दिला आहे. १३ आणि १२ असा निकाल घ्या, मात्र त्यांना मतदानाचा अधिकार देऊ नका, अशी विनंती पाटील यांनी राज्य सरकारला केली. या निर्णयाचे दुष्परिणाम सर्वांना भोगावे लागतील, असा इशाराही त्यांनी दिला. कोल्हापूरकरांनी बंटी पाटील यांना आशीर्वाद आणि ताकद दिली असून अन्याय झाला तर आम्ही पाठीशी उभे राहतो, हे त्यांनी दाखवून दिल्याचे कौतुक पाटील यांनी केले.
स्रोत: मूळ बातमी
Leave a Reply