वनदर्शन सहल: आयआरसीटीसीच्या पाच जंगल सफारी १९ नोव्हेंबरपासून

'वनदर्शन' सहल: १९ नोव्हेंबरपासून महाराष्ट्राच्या जंगलात पाच सफारी फेऱ्या निघणार आहेत. मुंबईहून रेल्वेने प्रवास, तिकिटे आणि सफारी परमिटची सोय पॅकेजमध्ये आहे.

महाराष्ट्रातील जंगलं, तिथलं वन्यजीवन आणि जैवविविधता जवळून अनुभवण्याची संधी आता पर्यटकांना मिळणार आहे. भारतीय रेल्वे खानपान आणि पर्यटन महामंडळ आणि राज्याच्या वन विभागाने एकत्र येऊन ‘वनदर्शन – निसर्गाचा अनुभव घ्या, वन्यजीवांचा शोध घ्या!’ ही विशेष पर्यटन मालिका सुरू केली आहे. या मालिकेतील पहिली सहल १९ नोव्हेंबर २०२६ पासून निघणार आहे.

पाच फेऱ्या, चार रात्री-पाच दिवसांचे नियोजन

या उपक्रमात चार रात्री आणि पाच दिवसांच्या एकूण पाच सहली आयोजित करण्यात आल्या आहेत. मुंबईहून विदर्भ एक्स्प्रेसने (१२१०५) गुरुवारी प्रस्थान होईल, तर गोंदिया येथून १२१०६ विदर्भ एक्स्प्रेसने रविवारी परतीचा प्रवास होईल. पॅकेजनुसार प्रवासाचे प्रारंभिक आणि परतीचे स्थानक निश्चित केले जाणार आहे.

आणखी वाचा ·दारू पिल्याने लिव्हर किती वर्षांत खराब होते?

पॅकेजमध्ये संबंधित अटींनुसार पुष्टी झालेली रेल्वे तिकिटे आणि वन्यजीव सफारीचे परमीट उपलब्ध करून दिले जाणार आहे. प्रत्येक फेरीसाठी थ्री एसी आणि टू एसीचे प्रत्येकी सहा बर्थ उपलब्ध असतील. जागा मर्यादित असल्याने वन्यजीवप्रेमी, छायाचित्रकार आणि कुटुंबीयांना या सहलीत सहभागी होता येणार आहे.