मुंबईवरील २६/११ हल्ल्याचा मास्टरमाइंड हाफिज सईद याच्या पक्षाला पाकिस्तानात झालेल्या संसदीय पोटनिवडणुकीत मोठा पराभव पत्करावा लागला आहे. पाकिस्तानच्या पंजाब प्रांतातील गुजरांवाला (एनए-७७) जागेवर ही पोटनिवडणूक झाली होती. सत्ताधारी पाकिस्तान मुस्लिम लीग नवाज (पीएमएल-एन) पक्षाने हाफिज सईद समर्थित उमेदवाराचा पराभव केला आहे.
## निकाल काय लागला?
पाकिस्तानच्या निवडणूक आयोगाने या निवडणुकीचा निकाल जाहीर केला आहे. हाफिज सईद यांची राजकीय शाखा असलेल्या पाकिस्तान मरकजी मुस्लिम लीग (पीएमएमएल) चे उमेदवार मोहम्मद इब्राहिम गुर्जर यांना ३० हजार मते मिळाली. तर पीएमएल-एनचे उमेदवार राशिद बशीर विर्क यांनी ४३ हजारांहून अधिक मते मिळवून विजय मिळवला. ही जागा खासदार महमूद बशीर विर्क यांच्या निधनामुळे रिक्त झाली होती. या निवडणुकीत इम्रान खान यांच्या पीटीआय, पाकिस्तान पीपल्स पार्टी आणि जमात ए इस्लामी या पक्षांनी एकही उमेदवार दिला नव्हता.
## कमी मतदान आणि बहिष्कार
या पोटनिवडणुकीत अत्यंत कमी टक्के मतदान झाले. एका गावातील लोकांनी या निवडणुकीवर पूर्णपणे बहिष्कार टाकला होता. त्या गावातून एकही मत पडले नाही. निवडणूक आचारसंहितेचे उल्लंघन केल्याप्रकरणी सत्ताधारी पक्षाच्या पाच महिला खासदारांना निवडणूक आयोगाने कारणे दाखवा नोटीस बजावली आहे. पराभवानंतर पीएमएमएलने निकाल अमान्य केला असून सत्ताधारी पीएमएल-एनवर मोठ्या प्रमाणावर गडबड केल्याचे आरोप केले आहेत.
## २०२४ मध्येही एकही जागा नाही
पीएमएमएलने २०२४ च्या सर्वसाधारण निवडणुकीतही नशीब अजमावले होते. त्यावेळीही त्यांना एकही जागा जिंकता आली नव्हती. बंदी घातलेल्या लष्कर ए तोयबा आणि जमात उद दावा या संघटनांचा संस्थापक असलेल्या हाफिज सईदची ही नवी राजकीय संघटना पाकिस्तानी सैन्याच्या समर्थनासाठी काम करत असल्याचे सांगितले जाते. मुंबईवर २००८ मध्ये झालेल्या हल्ल्यात १६६ निर्दोष व्यक्तींचा मृत्यू झाला होता. त्याचा मास्टरमाइंड हाफिज सईद असून तो भारताचा मोस्ट वाँटेड दहशतवादी आहे. त्याला आंतरराष्ट्रीय स्तरावर दहशतवादी म्हणून घोषित करण्यात आले आहे. असे असतानाही त्याने पाकिस्तानात मोठे नेटवर्क उभारले असून पाकिस्तानच्या राजकारणात आपला जम बसवण्याचा प्रयत्न करत आहे.
स्रोत: मूळ बातमी
Leave a Reply