गोकुळ दूधसंघाच्या अध्यक्षपदाच्या निवडणुकीवरून राज्यातील राजकीय वातावरण तापले आहे. उच्च न्यायालयातून या प्रकरणात महत्त्वाचा निर्णय आल्यानंतर महायुतीच्या गोटात हालचालींना वेग आला आहे. या निर्णयाच्या पार्श्वभूमीवर महायुतीच्या नेत्यांची कोल्हापूर जिल्हा मध्यवर्ती बँकेत तातडीची बैठक बोलावण्यात आली आहे. मंत्री हसन मुश्रीफ, चंद्रकांत पाटील आणि प्रकाश आबिटकर यांच्यासह महत्त्वाचे नेते या बैठकीत सहभागी होणार असून ते जिल्हा मध्यवर्ती बँकेकडे रवाना झाले आहेत. या बैठकीत अध्यक्ष निवडीबाबत महत्त्वाची चर्चा होणार आहे.
न्यायालयाने नेमके काय म्हटले?
उद्या गोकुळ दूधसंघाच्या अध्यक्षपदाची निवडणूक होणार आहे. निवडून आलेले २५ सदस्य मतदान करतील, त्याचबरोबर शासनाने अध्यादेश काढून ज्यांची नियुक्ती केली होती, ते सदस्यही मतदान करतील. मात्र शासन नियुक्त सदस्यांचे मतदान वेगळे ठेवले जाणार आहे. निकाल जाहीर करून अध्यक्षांची निवडही केली जाणार आहे. मात्र संपूर्ण निवडणूक प्रक्रिया ही अंतिम निकालाच्या अधीन राहणार आहे. राज्य शासनाकडून करण्यात आलेली अध्यादेश स्थगितीची मागणीही फेटाळण्यात आली आहे. अध्यादेश चूक की बरोबर, हे अद्याप ठरलेले नाही.
कोल्हापुरात मोर्चा आणि राजकीय घडामोडी
सध्या राज्यभरात गोकुळ दूधसंघाच्या निवडणुकीचा विषय चांगलाच गाजत आहे. सरकारने गोकुळवर चार संचालक नेमण्याचा अध्यादेश काढला आहे. मात्र शासनाच्या या निर्णयाला विरोधी पक्षांकडून तीव्र विरोध होत आहे. याच पार्श्वभूमीवर आज सतेज पाटील यांच्या नेतृत्वात कोल्हापूरमध्ये भव्य मोर्चा काढण्यात आला होता. या मोर्चाला राष्ट्रवादी शरद पवार गटाचे नेते जयंत पाटील यांचीही उपस्थिती होती. या मोर्चामधून सतेज पाटील यांनी महायुती सरकारवर जोरदार हल्लाबोल केला. देशभरात फक्त अमुल आणि मदर इंडिया हे दोनच दुधाचे ब्रँड ठेवण्याचे षडयंत्र यामागे असल्याचा आरोप सतेज पाटील यांनी केला. तसेच गोकुळवर चार संचालक नेमण्याचा अध्यादेश हे मंत्री चंद्रकांत पाटील आणि हसन मुश्रीफ यांचे पाप असल्याचेही सतेज पाटील यांनी म्हटले आहे. या मोर्चानंतरच न्यायालयातून ही बातमी समोर आली आणि त्यानंतर काही तासांतच अध्यक्षपदाची निवडणूक होणार असल्याने राजकीय घडामोडींना वेग आला आहे.
स्रोत: मूळ बातमी
Leave a Reply