बिहारमधील मोकामा मतदारसंघाचे आमदार अनंत सिंह यांच्या कन्येच्या विवाह सोहळ्याची सध्या देशभर चर्चा रंगली आहे. शिवांगी हिचा विवाह येत्या २५ नोव्हेंबर रोजी नदावां गावात होणार असून, सोहळ्याची तयारी जोरात सुरू आहे. देशविदेशातून पाहुणे येणार असून, अनेक मान्यवरही या सोहळ्याला हजेरी लावणार आहेत.
जावयाला दोन कोटींची गाडी भेट
अनंत सिंह आपल्या जावयाला लँड रोव्हर डिफेंडर ही महागडी गाडी भेट म्हणून देणार आहेत. या गाडीची किंमत दीड ते दोन कोटी रुपये असल्याचे सांगितले जात आहे. ही गाडी त्यांच्या दारात पोहोचली असून, विवाह सोहळ्यात ती आकर्षणाचे केंद्र ठरणार आहे. या गाडीचा सर्वोच्च प्रकार तीन कोटी रुपयांपर्यंत जातो, त्यामुळे देशातील सर्वांत महागड्या गाड्यांमध्ये तिची गणना होते.
दहा एकरांवर शाही सोहळा
विवाह सोहळा दहा एकर जागेवर होणार आहे. तिथे तंबू आणि मंडप उभारण्याचे काम सुरू आहे. मंडपासाठी उत्तर प्रदेशातील मऊ येथून कारागीर बोलावण्यात आले आहेत, तर सजावटीसाठी परदेशातून फुले मागवण्यात आली आहेत. दुबईतून सहा मॉडेल्सही या सोहळ्यासाठी येणार आहेत. बॉलिवूड आणि भोजपुरी कलाकारांना खास आमंत्रण देण्यात आले आहे. लालू प्रसाद यादव आणि नितीश कुमार यांच्यासह पंतप्रधान नरेंद्र मोदी यांनाही आमंत्रण देण्यात येणार आहे. भारतासह परदेशातूनही पाहुणे येणार आहेत.
दीडशेहून अधिक पदार्थ, चार लाख पाहुणे
सोहळ्यात दीडशेहून अधिक प्रकारचे पदार्थ असणार आहेत. एकूण चार लाख पाहुणे येण्याची अपेक्षा असून, त्यांच्या जेवणाची खास व्यवस्था करण्यात आली आहे.
जावई कोण?
ऋषिकेश कुमार हे पटनाजवळील बिहटा येथील कृष्णानगरचे रहिवासी आहेत. त्यांचे वडील रणविजय सिंह आहेत. ऋषिकेश यांनी अमेरिकेतील जॉर्जिया स्टेट विद्यापीठातून एमबीए केले असून, तिथेच ते नोकरी करत आहेत.
स्रोत: मूळ बातमी
Leave a Reply