‘रामायण’ चित्रपटात यशने रावणाची भूमिका साकारली आहे, पण त्याला आवाज शरद केळकरने दिला आहे. शरदने हिंदीच्या भागासाठी यशच्या भूमिकेला आवाज दिला आहे. नुकत्याच दिलेल्या मुलाखतीत शरदने डबिंग करताना आलेल्या अडचणी आणि चित्रपटातील आवडते प्रसंग उघड केले आहेत.
नितेश तिवारींसोबत काम करण्याची इच्छा पूर्ण
दिग्दर्शक नितेश तिवारी आणि चित्रपटाच्या मुख्य टीमने यशच्या रावणाच्या भूमिकेसाठी हिंदी डबिंग करण्याची जबाबदारी शरदकडे सोपवली होती. शरदची नितेश तिवारी यांच्यासोबत काम करण्याची बऱ्याच दिवसांपासून इच्छा होती. मागच्या वर्षी रबी दुबेच्या घरी त्यांची नितेश यांच्याशी भेट झाली होती. त्यावेळी त्याने काम करण्याची इच्छा बोलून दाखवली होती. अखेर रामायणाच्या निमित्ताने त्याला ही संधी मिळाली, असं शरदने सांगितलं.
यश हिंदी भाषा चांगल्या प्रकारे बोलतो. मात्र त्याची मातृभाषा कन्नड असल्यामुळे हिंदी शब्दांचा उच्चार आणि बोलण्याची लय यात फरक जाणवतो. त्यामुळे हिंदी आवृत्तीत त्याच्या भूमिकेसाठी वेगळा आवाज देण्याचा निर्णय घेतला गेला. डबिंग दरम्यान शरदचं यशसोबत बोलणं व्हायचं. काही प्रसंग चांगले कसे करता येतील, याबाबत यश स्वतःदेखील सूचना द्यायचा. दोघांमध्ये चांगला समन्वय होता, असं शरदने सांगितलं.
सर्वांत थकवणारा डबिंग अनुभव
शरदने हा अनुभव त्याच्या सर्वांत थकवणाऱ्या डबिंग अनुभवांपैकी एक असल्याचं सांगितलं. त्याच्या मते रावणाची भूमिका यशच्या कारकिर्दीतील सर्वांत कठीण भूमिकांपैकी एक आहे. चित्रपटात रावणाची पार्श्वभूमी आणि तो लंकेचा राजा होण्यापूर्वीचा प्रवासही दाखवण्यात आला आहे.
चित्रपटातील आवडत्या प्रसंगाबद्दल विचारलं असता शरदने तीन प्रसंगांचा उल्लेख केला. यात रावणाची दहा तोंड दिसणारा प्रसंग, विद्युतजिह्वाचा प्रसंग आणि सुरुवातीला रावण ब्रह्मदेवाकडून वरदान मागतो तो प्रसंग त्याला विशेष आवडला. वरदान मागतानाच्या प्रसंगात रावण सुरुवातीला अशक्त आणि दुर्बल दिसतो. मात्र त्याची शक्ती वाढत जाते तसतसा त्याच्या आवाजातही रुबाब आणि अहंकार जाणवू लागतो. रावण हा बुद्धिमान आणि अभ्यासू व्यक्ती असल्याने डबिंग करताना त्याच्या आवाजात गोंधळ आणि संभ्रम जाणवणार नाही, याची शरदला काळजी घ्यावी लागली होती.
शरदच्या मते, रावण आपल्या दहा मस्तकांशी संवाद साधत युद्ध करावं की थांबावं, याचा विचार करतो तो प्रसंग त्याला सर्वाधिक आवडला. नितेश तिवारी आणि यश यांनी हा प्रसंग अतिशय प्रभावीपणे साकारल्याचंही त्याने सांगितलं. यापूर्वी शरदने ‘बाहुबली’, ‘सालार’ आणि ‘आदिपुरुष’ सारख्या चित्रपटांमध्ये प्रभाससाठी हिंदी डबिंग केलं होतं.
स्रोत: मूळ बातमी
Leave a Reply