दिवाळीच्या सणाला घरात गोडाचे विविध पदार्थ बनवले जातात. लहानांपासून मोठ्यांपर्यंत सगळ्यांनाच गोड पदार्थ खायला आवडतात. मात्र मधुमेह किंवा इतर आजाराने त्रस्त असलेले लोक साखरेचा वापर करून बनवलेले गोड पदार्थ खाणे टाळतात. अशांसाठी साखरेचा अजिबात वापर न करता पौष्टिक मखाणा खीर बनवता येते. ही खीर अवघ्या दहा मिनिटांत तयार होते.
साहित्य
मखाणा, फुल क्रिम दूध, गूळ, काजू, बदाम, केशर, वेलची पावडर, पिस्त्याचे काप आणि तूप एवढे साहित्य या खिरीसाठी लागते.
कृती
सर्वप्रथम कढईमध्ये मखाणा मंद आचेवर कुरकुरीत होईपर्यंत भाजा. त्यानंतर वरून थोडे तूप घालून परतून घ्या. भाजलेले मखाणे थंड करून मिक्सरच्या भांड्यात घालून बारीक वाटून घ्या. कढईमध्ये एक लिटर दूध गरम करण्यासाठी ठेवा. दुधाला एक उकळी आल्यानंतर गॅस मंद आचेवर ठेवा. दूध घट्टसर झाल्यानंतर त्यात बारीक केलेले मखाणे घाला आणि चमच्याने सतत मिसळत राहा. त्यानंतर त्यात बारीक केलेले काजू, बदाम, पिस्ता आणि केशराच्या काड्या, वेलची पावडर घालून सर्व साहित्य व्यवस्थित मिसळा. तयार खीर थंड झाल्यानंतरच गुळाची पावडर घालून मिसळा. गूळ वापरून बनवलेली ही खीर मधुमेह किंवा इतर आजाराने त्रस्त असलेले लोकही खाऊ शकतात. मखाणे आणि गूळ हे दोन्ही पदार्थ शरीरासाठी फायदेशीर मानले जातात आणि थंडीच्या दिवसांत शरीरातील उष्णता टिकवून ठेवण्यासाठी मखाणे खाणे उत्तम मानले जाते.
स्रोत: मूळ बातमी
Leave a Reply