जळगाव जिल्हा बँकेच्या निवडणुकीत जलसंपदा मंत्री गिरीश महाजन यांनी मित्रपक्षांसोबत एकत्र निवडणूक लढविण्याबाबत अनुकूलता दर्शविली आहे. त्यामुळे भाजप, शिवसेना आणि राष्ट्रवादी काँग्रेस यांची महायुती या निवडणुकीत एकत्र येण्याचे चित्र निर्माण झाले आहे. मात्र, राष्ट्रवादी काँग्रेससोबत जागावाटपावर अद्याप कोणतीही चर्चा झालेली नाही. त्यामुळे या निवडणुकीबाबत विविध तर्कवितर्क लावले जात आहेत.
या निवडणुकीत उमेदवारी अर्ज दाखल करण्यापासून ते छाननीपर्यंतच्या टप्प्यात घडलेल्या घडामोडींमुळे महायुतीतील घटक पक्षांमध्ये मोठे मतभेद निर्माण झाले आहेत. ते मतभेद अजूनही कायम आहेत. मंत्री महाजन यांनी पुढाकार घेऊन महायुतीने एकत्र निवडणूक लढवावी, असे संकेत दिले असले तरी अनेक ठिकाणी महायुतीच्या उमेदवाराविरोधात भाजपच्याच उमेदवारांनी अर्ज दाखल केले आहेत. ही बाबही दुर्लक्षित करता येणार नाही.
महाविकास आघाडीचे पंधरा उमेदवार रिंगणात
महाविकास आघाडीने या निवडणुकीत पंधरा उमेदवार रिंगणात उतरविले आहेत. राष्ट्रवादी काँग्रेस शरदचंद्र पवार पक्ष, शिवसेना उद्धव बाळासाहेब ठाकरे पक्ष आणि काँग्रेस या तीन पक्षांची महाविकास आघाडी आहे. असे असताना मात्र महाविकास आघाडीच्या पदाधिकाऱ्यांची अजूनही बैठक झालेली नाही. दिवाळीनंतर आता या बैठकांना वेग येणार आहे.
विशेष म्हणजे, राष्ट्रवादी काँग्रेसचे आमदार अनिल पाटील आणि विद्यमान अध्यक्ष संजय पवार यांच्यासोबत अजून भाजपची बैठक झालेली नाही. ती बैठक केव्हा होणार, याकडे सर्वांचे लक्ष लागून आहे.
माघारीनंतर चित्र होणार स्पष्ट
आता रविवारी, ८ नोव्हेंबरला दिवाळीची सुटी आहे. ११ नोव्हेंबरपर्यंत शासकीय कार्यालयांना सुट्या असल्याने १२ नोव्हेंबरला कार्यालये सुरू होतील. माघारीची मुदत १७ नोव्हेंबरपर्यंत आहे. कार्यालये सुरू झाल्यानंतर माघारीसाठी सुटीचे दिवस वगळता केवळ चारच दिवस शिल्लक राहतील. यात किती जण माघार घेतात, त्यावर निवडणुकीचे चित्र अवलंबून असणार आहे.
स्रोत: मूळ बातमी
Leave a Reply