दिवाळीच्या सणासुदीच्या पार्श्वभूमीवर राज्य सरकारने शेतकऱ्यांसाठी दोन अत्यंत महत्त्वाचे निर्णय जाहीर केले आहेत. या निर्णयांमुळे राज्यातील तब्बल दोन लाख ६० हजार शेतकऱ्यांना थेट लाभ मिळणार आहे. पीएम किसान योजनेचा २४ वा हप्ता शेतकऱ्यांच्या खात्यात जमा झाल्यानंतर सरकारने हे आणखी दोन निर्णय घेतले आहेत.
आदिवासी शेतकऱ्यांना फार्मर आयडी
पहिला निर्णय म्हणजे आदिवासी शेतकऱ्यांना फार्मर आयडी देण्याचा. आदिवासी समाज वर्षानुवर्षे जमीन कसत आहे, मात्र त्यांची नावे कागदोपत्री नाहीत. त्यामुळे इतर योजनांमध्येही त्यांचा समावेश होत नाही. राज्यातील अनेक भागांमध्ये वेगवेगळ्या कारणांमुळे फार्मर आयडी मिळालेले नाहीत. राज्याचे महसूल मंत्री चंद्रशेखर बावनकुळे यांनी याबाबत घोषणा केली. आदिवासी शेतकऱ्यांनी १ जानेवारी २०१५ पूर्वीचा पुरावा दिला तरी त्यांना ही सुविधा मिळणार आहे. या निर्णयामुळे एक लाख ६० हजार आदिवासी शेतकऱ्यांना लाभ होणार आहे.
पीक पाहणी आता ऑनलाईन
दुसरा मोठा निर्णय म्हणजे आता पीक पाहणी ऑनलाईन पद्धतीने करण्यात येणार आहे. त्यामुळे एक लाखांहून अधिक शेतकऱ्यांची रखडलेली पीक पाहणी करणे आता शक्य होणार आहे. यामुळे शेतकऱ्यांना नुकसान भरपाई मिळणे शक्य होणार आहे. दुष्काळी परिस्थिती आणि अतिवृष्टीमुळे पेरलेले पीक पदरात आलेले नाही, त्यामुळे शेतकरी हवालदिल झाला आहे. या परिस्थितीत सरकारने योग्य पावले उचलणे महत्त्वाचे ठरणार आहे.
स्रोत: मूळ बातमी
Leave a Reply