शहादा तालुक्यातील सारंगखेडा येथे एकमुखी दत्त यात्रोत्सवाच्या निमित्ताने आयोजित चेतक फेस्टिवलमध्ये यंदा प्रथमच महिलांसाठी स्वतंत्र महिला कक्ष सुरू करण्यात येणार आहे. महिलांच्या कलागुणांना वाव देण्यासाठी तसेच त्यांच्या सहभागातून विविध सांस्कृतिक, मनोरंजनात्मक आणि ज्ञानवर्धक उपक्रम राबविण्याच्या उद्देशाने चेतक महिला समितीची स्थापना करण्यात आली आहे.
समितीची रचना आणि उद्देश
या समितीच्या माध्यमातून महिलांसाठी स्वतंत्र कार्यक्रमांचे आयोजन करण्यात येणार असून त्यासाठी फेस्टिवलकडून स्वतंत्र व्यासपीठ उपलब्ध करून दिले जाणार आहे. महिलांना आपले विचार मांडता यावेत, कलागुणांचे सादरीकरण करता यावे आणि विविध क्षेत्रांत आपली प्रतिभा दाखवता यावी, यासाठी ‘महिला कट्टा’ हे स्वतंत्र व्यासपीठ उपलब्ध करून दिले जाणार आहे. २३ डिसेंबरपासून एकमुखी दत्त यात्रोत्सवाला प्रारंभ होत आहे.
चेतक फेस्टिवलचे अध्यक्ष जयपालसिंह रावल यांच्या हस्ते समितीच्या पदाधिकाऱ्यांची नियुक्ती करण्यात आली. अध्यक्षपदाची धुरा ऐश्वर्या रावल यांच्यावर सोपविण्यात आली असून कार्यक्रम प्रमुख म्हणून मेघा खारकर यांची निवड झाली आहे. कार्यकारिणीत उपाध्यक्ष सीमा पाटील, सचिव योगिता राजपूत आणि योगिनी वाघ यांच्यासह ज्योती सूर्यवंशी, वैशाली निकम, उमा मोरे, मंदाकिनी निकम, योगिता पाटील, करिष्मा महाले, ऋतिका गिरासे, दीपिका मिस्तरी, प्रियंका राजपूत, नलिनी पाटील, प्राजक्ता सूर्यवंशी आणि माधुरी मोरे यांचा समावेश आहे.
यात्रोत्सवात महिलांचा सहभाग वाढणार
सारंगखेडा येथील एकमुखी दत्त यात्रेने देशाच्या कानाकोपऱ्यात आपली वेगळी ओळख निर्माण केली आहे, असे जयपालसिंह रावल यांनी सांगितले. यात्रेचे हे वैशिष्ट्यपूर्ण स्थान कायम राखतानाच त्यात अधिक विविधता आणणे, पारंपरिकतेचे जतन करणे आणि ज्ञान, मनोरंजन व विज्ञानाची ग्रामविकासाशी सांगड घालणे, हा या उपक्रमामागील मुख्य उद्देश आहे. महिलांच्या सहभागातून यात्रोत्सवाच्या आकर्षणात आणखी भर पडणार असून सांस्कृतिक कार्यक्रमांसह सामाजिक, शैक्षणिक आणि मनोरंजनात्मक उपक्रमांच्या माध्यमातून महिलांना एकत्र आणण्याचा प्रयत्न समितीच्या माध्यमातून केला जाणार आहे.
स्रोत: मूळ बातमी
Leave a Reply