अभिनेत्री किमरी जॉन्सन यांचे निधन; वयाच्या ५०व्या वर्षी

हॉलिवूड मनोरंजन विश्वातून एक दुःखद बातमी समोर आली आहे. लोकप्रिय अमेरिकन अभिनेत्री आणि मॉडेल किमरी जॉन्सन यांचे वयाच्या ५०व्या वर्षी निधन झाले आहे. ४ नोव्हेंबर २०२६ रोजी त्यांनी अखेरचा श्वास घेतला. त्यांच्या निधनाच्या बातमीने चाहत्यांसह मनोरंजन विश्वात हळहळ व्यक्त केली जात आहे.

किमरी जॉन्सन ‘बेव्हर्ली हिल्स, ९०२१०’ या लोकप्रिय मालिकेमुळे विशेष चर्चेत आल्या होत्या. या मालिकेतील त्यांच्या भूमिकेमुळे त्यांना मोठी ओळख मिळाली होती.

हृदयविकाराशी झुंज

किमरी जॉन्सन यांना २७ ऑक्टोबर रोजी हार्ट अटॅक आला. त्यांची प्रकृती अचानक बिघडल्याने त्यांना तातडीने रुग्णालयात दाखल करण्यात आले. त्यांना लॉस एंजेलिसमधील सेडर्स-सिनाई रुग्णालयात नेण्यात आले होते. तिथे तपासणी केल्यानंतर त्यांना हृदयाशी संबंधित ‘अ‍ॅन्युरिझम’ची समस्या असल्याचे निदान झाले.

त्यांच्या भाची रोंडा स्कॉट यांनी दिलेल्या माहितीनुसार, या आजारामुळे ४ नोव्हेंबर रोजी त्यांची प्राणज्योत मालवली.

अभिनय आणि मॉडेलिंग कारकीर्द

किमरी जॉन्सन यांनी १९९८ मध्ये लोकप्रिय टीव्ही मालिका ‘बेव्हर्ली हिल्स, ९०२१०’मधून अभिनय क्षेत्रात पदार्पण केले होते. या मालिकेच्या एका भागात त्यांनी ज्युडी ही भूमिका साकारली होती. त्यानंतर २००० मध्ये त्या पामेला अँडरसनसोबत ‘V.I.P.’ या मालिकेतही झळकल्या होत्या.

त्यांच्या अभिनय कारकिर्दीत ‘Dude, Where’s My Car?’, ‘Shadow Fury’, ‘Spanish Fly’, ‘Wanda at Large’, ‘Gang Warz’ आणि ‘The Summer of Massacre’ यांसारख्या चित्रपट आणि मालिकांचा समावेश आहे. २०१७ मध्ये ‘Tucker’s War’ या मालिकेच्या एका भागात त्या शेवटच्या दिसल्या होत्या.

किमरी जॉन्सन केवळ अभिनेत्री नव्हत्या, तर त्या एक यशस्वी मॉडेलही होत्या. १९९३ मध्ये त्यांनी ‘मिस पेनसिल्व्हेनिया यूएसए’चा किताब पटकावला होता. त्यानंतर ‘मिस यूएसए’ स्पर्धेच्या अंतिम फेरीपर्यंत त्यांनी मजल मारली होती. २०११ मध्ये त्यांनी ‘SkinGlow by Kimmarie’ हा स्वतःचा स्किनकेअर ब्रँड सुरू केला होता. निधनापर्यंत त्या हा व्यवसाय सांभाळत होत्या.

स्रोत: मूळ बातमी