दिवाळी सणाच्या पार्श्वभूमीवर नाशिक शहरात कचऱ्याचे प्रमाण लक्षणीयरीत्या वाढले आहे. घरोघरी सुरू असलेली स्वच्छता आणि बाजारपेठांमधून निघणारा कचरा यामुळे महापालिकेसमोर अतिरिक्त कचरा उचलण्याचे आव्हान उभे राहिले आहे. त्यासाठी सकाळी आणि सायंकाळी अतिरिक्त स्वच्छता कर्मचारी नियुक्त करण्यात आले असून, विभागनिहाय प्रत्येकी दोन अशा एकूण १२ अतिरिक्त घंटागाड्यांच्या माध्यमातून कचरा संकलन केले जात आहे.
दररोज १० ते १५ टन अतिरिक्त कचरा
सणासुदीच्या काळात बाजारपेठेतून प्रतिदिन १० ते १५ टन अतिरिक्त कचरा बाहेर पडत आहे. दिवाळीनिमित्त घरे आणि दुकाने यांच्यासह विविध शासकीय तसेच खासगी आस्थापनांमध्ये मोठ्या प्रमाणावर साफसफाई मोहीम हाती घेण्यात आली आहे. त्यामुळे निघणारा अतिरिक्त कचरा वेळेत उचलण्यासाठी या १२ घंटागाड्यांच्या अतिरिक्त फेऱ्या महापालिकेने सुरू केल्या आहेत.
जीपीएस नियंत्रण आणि दंडाची तरतूद
महापालिकेच्या घनकचरा व्यवस्थापन विभागाकडे सहा विभागांसाठी जवळपास ४०५ घंटागाड्या कचरा संकलनासाठी आहेत. या घंटागाड्यांवर जीपीएस यंत्रणेद्वारे नियंत्रण ठेवले जाते. प्रत्येक घंटागाडीसाठी मार्ग आणि वेळा निश्चित करून दिल्या आहेत. वेळ किंवा मार्ग चुकल्यास अथवा नेमून दिलेल्या ठिकाणी घंटागाडी न गेल्यास १० हजार रुपये प्रतिदिन दंडाची तरतूद आहे. शहरातून दररोज सुमारे ८०० टन कचरा संकलित केला जातो, मात्र दिवाळीमुळे या प्रमाणात वाढ झाली आहे.
स्रोत: मूळ बातमी
Leave a Reply