दिवाळीसाठी नाशिकच्या पाणीपुरवठ्यात दररोज ३० दशलक्ष लिटर वाढ

दिवाळीच्या पार्श्वभूमीवर वाढत्या पाण्याची गरज भागविण्यासाठी नाशिक शहराच्या पाणीपुरवठ्यात प्रतिदिन ३० दशलक्ष लिटरने वाढ करण्यात आली आहे. धरणांमधून दररोज ६१० दशलक्ष लिटर पाण्याचा उपसा केला जात आहे. त्याचबरोबर शहरात ३० टँकरने पाणीपुरवठा केला जात असल्याने सणासुदीत गृहिणींना दिलासा मिळण्याचा प्रयत्न केला जात आहे.

धरणांमधून उपसा वाढवला

शहराला पाणीपुरवठा करणाऱ्या गंगापूर, दारणा व मुकणे धरणात पुरेसा पाणीसाठा आहे. मात्र, जलसंपदा विभागाने दुष्काळाच्या पार्श्वभूमीवर स्थानिक स्वराज्य संस्थांना आत्तापासूनच दहा टक्के पाणी कपात करण्याचे निर्देश दिले आहेत. त्यानुसार नाशिक महापालिकेने अंमलबजावणी सुरू केली आहे. गंगापूर, मुकणे व दारणा या तीनही धरणांमधून ५८० दशलक्ष लिटर पाण्याचा उपसा पंपिंग स्टेशनद्वारे केला जातो. सध्या अतिरिक्त तीस दशलक्ष लिटर म्हणजेच एकूण सुमारे ६१० दशलक्ष लिटर पाण्याचा उपसा केला जात आहे. अशी माहिती पाणीपुरवठा विभागाचे अधीक्षक अभियंता रवींद्र धारणकर यांनी दिली आहे.

दहा टक्के कपात दिवाळीनंतर

पाणीपुरवठ्याच्या वाढत्या तक्रारींच्या अनुषंगाने तुर्त कपात बंद करण्यात आली असून दिवाळीनंतर दहा टक्के कपात केली जाणार आहे. मात्र, दहा टक्के कपात सांगितली जात असली तरी प्रत्यक्षात २५ टक्के पाणी कपात होणार आहे. सिडको आणि जुने नाशिक भागात पाणी साठवण क्षमता कमी आहे. तसेच अनेक भागात विकासकामे सुरू असल्याने जलवाहिनी फुटण्याचे प्रकार घडत आहेत. दिवाळीनिमित्त पाण्याची मागणी वाढल्याने एकीकडे धरणांमधून पाण्याचा उपसा वाढविण्यात आला, तर दुसरीकडे गरज असेल त्या ठिकाणी टँकरने पाणीपुरवठा सुरू करण्यात आला आहे.

स्रोत: मूळ बातमी