गोकुळ दूध संघावर राज्य सरकारने चार संचालक नियुक्त करण्याचा निर्णय घेतल्याने या संघाचे राजकारण चांगलेच तापले आहे. कालपर्यंत काँग्रेस आणि ठाकरेंच्या सेनेकडून राज्य सरकारवर टीका होत असतानाच आता शिंदेसेनेनेही राज्य सरकारला सुनावले आहे. गोकुळ दूध संघाला शेतकऱ्यांनी लहान मुलासारखे वाढवले आहे, या संघाचा आदर करा, लोकशाहीचा आदर करा, चिटिंग करू नका, अशा शब्दांत शिंदेसेनेने भाजपला सुनावले आहे. त्यामुळे गोकुळच्या मुद्द्यावर आता युतीतच जुंपल्याचे चित्र निर्माण झाले आहे.
धंगेकर यांची भाजपवर टीका
गोकुळमध्ये चार संचालक नेमण्यात आल्याने शिंदेसेनेने नाराजी व्यक्त केली आहे. त्यानंतर शिंदेसेनेचे नेते रवींद्र धंगेकर यांनी या मुद्द्यावरून भाजपवर जोरदार हल्ला चढवला आहे. जनतेचा कौल महत्त्वाचा आहे, लोकशाहीत जनतेचा कौल घेतला जातो आणि जनतेने जो कौल दिला आहे, त्याचा आदर ठेवून कामकाज करावे लागते, असे धंगेकर म्हणाले. पण काही तरी त्रुटी ठेवायचा प्रयत्न करून अशा निवडणुकीला विलंब लावला जात आहे, असा आरोपही त्यांनी केला. उपाशी तापाशी राहून या संस्था वाढवलेल्या असतात आणि शेतकऱ्यांनी या संस्थांना मुलांसारखे वाढवलेले असते, त्यामुळे गोकुळमध्ये राजकारण न करता निकालाचा आदर राखला पाहिजे, असे धंगेकर यांनी सांगितले. सरकारने कमीत कमी हस्तक्षेप केला पाहिजे आणि संस्था टिकवली पाहिजे, असेही ते म्हणाले. ओठावर एक आणि पोटावर एक असे नको, जे पोटात आहे तेच ओठावर असले पाहिजे, उलट्या हाताने खाण्यापेक्षा सरळ हाताने खाल्लेले कधीही चांगले, अशा शब्दांत धंगेकर यांनी भाजपला सुनावले आहे.
सहकारात हस्तक्षेप योग्य नाही
१९५० रोजी विठ्ठलराव विखे पाटलांनी महाराष्ट्रात सहकार रुजवले आणि त्याला ७०-८० वर्षे झाली आहेत. महाराष्ट्राने सहकारात मोठे योगदान दिले असून, अनेकांची सहकाराशी नाळ जोडली गेली आहे. त्यामुळे आताच्या काळात या संस्थांमध्ये इतका हस्तक्षेप करणे योग्य नाही, असे धंगेकर म्हणाले. आम्ही सत्तेत असलो तरी आम्हाला लपून छपून बोलणे योग्य वाटत नाही; सहकाराला मोकळीक दिली पाहिजे, अशी भूमिका त्यांनी मांडली. राज्यात जे जे मुख्यमंत्री झाले त्यांनी या संस्थांना ताकद दिली आणि वेळ पडली तर आर्थिक ताकदही दिली. पण गोकुळ पाहिल्यावर मनाला वाईट वाटते आणि लोकशाही आहे की नाही, असे वाटते, असा उद्वेगही धंगेकर यांनी व्यक्त केला.
अशा निवडणुका निरपेक्ष झाल्या पाहिजेत आणि तोच लोकशाहीचा विजय असतो, असे धंगेकर म्हणाले. लोकशाहीचा आदर ठेवून चिटिंग करू नये. पूर्वी सहकारात सरकारचा हस्तक्षेप नव्हता, आता हस्तक्षेप दिसत आहे. खरे तर सहकारात पक्षीय राजकारण करू नये; शेतकऱ्यांची संस्था शेतकऱ्यांच्या हातात राहिली पाहिजे. राजकारण करून हस्तक्षेप करून संस्थेला वेठीस धरू नये. या संस्था महाराष्ट्राच्या वाहिन्या आहेत, त्यांना सरकारने ताकद दिली पाहिजे आणि त्याकडे राजकीय दृष्टीने पाहू नये, असे धंगेकर यांनी सांगितले. देशाच्या निवडणुकीपेक्षा गोकुळची निवडणूक मोठी झाली आहे, यात असे काय आहे, असा सवालही त्यांनी केला आहे.
स्रोत: मूळ बातमी
Leave a Reply