गोकुळमध्ये मुलाची एन्ट्री नाही, हसन मुश्रीफ म्हणाले

कोल्हापूर जिल्ह्यातील गोकुळ दूध संघाच्या निवडणुकीनंतर अध्यक्षपदाची कोंडी अजूनही सुटलेली नाही. या निवडणुकीत मावळते अध्यक्ष नाविद मुश्रीफ यांना पराभव पत्करावा लागला. दुसरीकडे सतेज पाटील यांच्या गटाला बहुमत मिळाले असले तरी अध्यक्षाची निवड होऊ शकलेली नाही. या पार्श्वभूमीवर शासनाने संघावर चार संचालक नेमण्याचा निर्णय घेतला आहे. या चार जणांमध्ये नाविद मुश्रीफ यांचे नाव असल्याची चर्चा सुरू झाली होती. पराभवानंतरही ते मागच्या दाराने संघात परत येणार असल्याचे बोलले जात होते. मात्र, त्यांचे वडील आणि मंत्री हसन मुश्रीफ यांनी या चर्चांना पूर्णविराम दिला आहे. माझा मुलगा गोकुळमध्ये जाणार नाही, असे त्यांनी माध्यमांशी बोलताना स्पष्टपणे सांगितले.

सरकारी संचालकांबाबत स्पष्टीकरण

शासनाने संचालक नेमण्याचा कायदा आणला असला तरी त्या जागांवर कोणत्याही पक्षाशी संबंधित व्यक्तीची निवड होणार नाही, असे हसन मुश्रीफ म्हणाले. माझ्या मुलाची मागच्या दाराने एन्ट्री होणार नाही. तिथे तज्ज्ञांचीच नियुक्ती होईल, असे त्यांनी सांगितले. कोणत्याही पक्षाशी संबंध नसलेल्या कार्यकर्त्याची शासनाकडून नेमणूक केली जाईल, अशी अपेक्षा त्यांनी व्यक्त केली.

चेअरमन निवडीची कोंडी कायम

सतेज पाटील यांना बहुमत आहे, मग त्यांनी कोरम पूर्ण करून आपला अध्यक्ष निवडावा, असे हसन मुश्रीफ म्हणाले. आम्ही त्यांना कुठे अडवले आहे, असा सवालही त्यांनी केला. मात्र, संघाच्या नियमांनुसार कोरम पूर्ण झाल्याशिवाय अध्यक्षाची निवड होऊ शकत नाही, असे त्यांनी स्पष्ट केले. कोरम नसेल तर अध्यक्षही निवडता येत नाही आणि बैठकही घेता येत नाही. एका नियमामुळे ही कोंडी निर्माण झाली आहे, असे ते म्हणाले. विरोधकांनी आपला अध्यक्ष निवडावा किंवा न्यायालयात जावे, आम्ही त्यांना अडवलेले नाही, असेही त्यांनी सांगितले. न्यायालय जो निर्णय देईल त्याचा आदर केला पाहिजे, असे त्यांचे म्हणणे आहे. निवडून आलेल्या लोकांच्या हातात सत्ता कशी जाईल, हाच प्रश्न असून त्यामुळेच शासनाने हा निर्णय घेतला आहे. शासन प्रशासक नेमू शकले असते, पण तसे केले नाही, असेही त्यांनी नमूद केले.

दरम्यान, या निवडणुकीत सोशल मीडियाच्या माध्यमातून विषारी प्रचार करण्यात आल्याचा आरोप हसन मुश्रीफ यांनी केला. संघ एवढा मोठा नसतानाही सोशल मीडियातून तो प्रचंड मोठा असल्याचे दाखवण्यात आले, असे ते म्हणाले. काँग्रेसमधील धर्मनिरपेक्ष विचारांच्या लोकांनी माझ्या मुलाच्या विरोधात जातीयवादी प्रचार केला, असा आरोप त्यांनी केला. सोशल मीडियातून आणि सभासदांमध्ये विष कालवण्यात आले. दोस्त दोस्त ना राहा, असे म्हणावे लागेल, अशा शब्दांत त्यांनी नाराजी व्यक्त केली.

स्रोत: मूळ बातमी