दोन दिवसांपूर्वी राष्ट्रवादीच्या ज्येष्ठ नेत्यांनी केंद्रीय गृहमंत्री अमित शाह यांची भेट घेतली होती. यामध्ये छगन भुजबळ, सुनील तटकरे आणि धनंजय मुंडे यांच्यासह इतर काही नेत्यांचा समावेश होता. दरम्यान, पक्षात महत्त्वाचे निर्णय घेताना डावलले जात असल्याची तक्रार या नेत्यांनी अमित शाह यांच्याकडे केल्याच्या बातम्या समोर आल्या होत्या. त्यावरून राजकीय वर्तुळात चर्चा सुरू झाली होती. यावर आता राष्ट्रवादी अजित पवार गटाचे राष्ट्रीय मुख्य प्रवक्ते उमेश पाटील यांनी पत्रकार परिषदेत पक्षाची भूमिका स्पष्ट केली असून, पक्षांतर्गत नाराजीचे वृत्त त्यांनी फेटाळून लावले आहे.
पाटील नेमके काय म्हणाले?
जे वार्तांकन झाले ते चुकीचे झाले, असे उमेश पाटील म्हणाले. पक्षाच्या राष्ट्रीय अध्यक्षा आणि पार्थ पवार यांनी यापूर्वीच केंद्रीय गृहमंत्री अमित शाह यांची भेट घेतली होती. तेव्हाच त्यांनी या शिष्टमंडळाचीही वेळ घेतली होती आणि शिष्टमंडळ भेट घेणार असल्याचे अमित शाह यांना सांगितले होते, असे पाटील यांनी स्पष्ट केले. पक्षात काही संकट आल्याच्या बातम्या समोर आल्या, मात्र पक्षात सर्व काही चांगले चालले आहे, असेही ते म्हणाले.
अजित पवार यांच्या कुटुंबाकडून महाराष्ट्राच्या काही अपेक्षा आहेत आणि या कुटुंबाबद्दल महाराष्ट्राच्या मनात श्रद्धा आहे, असे पाटील म्हणाले. रोहित पवार यांनी आधी हे सांगावे की ते कर्जत-जामखेडमधून निवडून येणार का, असा सवालही त्यांनी केला. आधी आपले घर सांभाळावे आणि मग गावकी बघावी, असेही ते म्हणाले.
नियुक्त्या आणि निधीबाबतही भाष्य
नियुक्त्या करताना कोणाला तरी तिथे नियुक्ती द्यावीच लागते, असे पाटील म्हणाले. भुजबळ बोलले, पण त्यासाठी कोअर कमिटीच्या बैठकीत चर्चा झाली होती आणि भुजबळ यांनीही आता त्याला मान्यता दिली आहे, असे त्यांनी सांगितले. नियुक्तीच्या बाबतीत सर्वच पक्षांत थोड्याफार प्रमाणात नाराजी असते आणि भाजपचेही काही लोक असमाधानी आहेत, असेही ते म्हणाले. आमदारांची तक्रार गांभीर्याने घ्यावीच लागते, असे त्यांनी नमूद केले.
विकासकामांसाठी निधीची कमतरता झाली हे खरे आहे, असे पाटील यांनी मान्य केले. याबाबत पक्ष नेतृत्वाला कल्पना दिली असून, ते या संदर्भात मुख्यमंत्र्यांशी बोलणार आहेत, असेही ते म्हणाले. अर्थखाते आपल्याकडे येणार आहे आणि आपण त्याची वाट पाहत आहोत, असेही उमेश पाटील यांनी यावेळी सांगितले.
स्रोत: मूळ बातमी
Leave a Reply