FD वर ज्येष्ठ नागरिकांना ७.२५% पर्यंत व्याज, नवे दर जाहीर

बचत सुरक्षित ठिकाणी गुंतवून त्यावर चांगला परतावा मिळावा, असे अनेकांना वाटते. त्यांच्यासाठी एक आनंदाची बातमी आहे. देशातील दोन प्रमुख सार्वजनिक क्षेत्रातील बँका, पंजाब नॅशनल बँक आणि कॅनरा बँक यांनी त्यांच्या मुदत ठेवींच्या व्याजदरांमध्ये बदल केले आहेत. हे नवीन दर नोव्हेंबर २०२६ पासून लागू झाले आहेत. या बदलांनंतर कॅनरा बँक सामान्य ग्राहकांसाठी जास्तीत जास्त ६.७५ टक्के आणि ज्येष्ठ नागरिकांसाठी ७.२५ टक्क्यांपर्यंत व्याजदर देत आहे. पंजाब नॅशनल बँक सामान्य ग्राहकांसाठी जास्तीत जास्त ६.६० टक्के आणि ज्येष्ठ नागरिकांसाठी ७.१० टक्क्यांपर्यंत व्याजदर देत आहे.

कॅनरा बँकेचे नवे दर

२ नोव्हेंबर २०२६ पासून कॅनरा बँकेने काही मुदत ठेवींवर १५ बेसिस पॉइंट्सपर्यंत व्याजदर वाढवले आहेत. बँकेची एक प्रमुख योजना म्हणजे ५५५ दिवसांची विशेष मुदत ठेव योजना. या योजनेअंतर्गत सामान्य ग्राहकांना आता ६.७५ टक्के वार्षिक व्याजदर मिळेल, जो पूर्वी ६.६० टक्के होता. ज्येष्ठ नागरिकांसाठी हा व्याजदर ७.१० टक्क्यांवरून ७.२५ टक्के करण्यात आला आहे. याशिवाय ४४४ दिवसांच्या मुदत ठेवीसाठी सामान्य ग्राहकांना ६.६५ टक्के आणि ज्येष्ठ नागरिकांना ७.१५ टक्के व्याजदर निश्चित करण्यात आला आहे.

बँकेच्या इतर मुदत ठेवींमध्ये ७ ते ४५ दिवसांच्या ठेवींवर ३ टक्के, ४६ ते ९० दिवसांच्या ठेवींवर ४ टक्के आणि ९१ ते १७९ दिवसांच्या ठेवींवर ४.२५ टक्के व्याजदर दिला जाईल. १८० ते २६९ दिवसांच्या मुदत ठेवींसाठी सामान्य नागरिकांना ५.२५ टक्के आणि ज्येष्ठ नागरिकांना ५.७५ टक्के व्याजदर मिळेल. २७० दिवसांपासून एका वर्षापेक्षा कमी कालावधीच्या ठेवींवर सामान्य ग्राहकांना ५.५० टक्के आणि ज्येष्ठ नागरिकांना ६ टक्के व्याजदर मिळेल. एका वर्षापासून ते एक वर्ष आणि तीन महिन्यांपर्यंतच्या ठेवींवर (४४४ दिवसांची योजना वगळता) अनुक्रमे ६.४० टक्के आणि ६.९० टक्के व्याजदर मिळतील. दोन ते १० वर्षांच्या ठेवींवर सामान्य ग्राहकांना ६.२५ टक्के आणि ज्येष्ठ नागरिकांना ६.७५ टक्के व्याज मिळेल.

पंजाब नॅशनल बँकेचे दर

पंजाब नॅशनल बँकेने मुदत ठेवींसाठी नवीन व्याजदर लागू केले आहेत, जे १ नोव्हेंबर २०२६ पासून प्रभावी झाले आहेत. बँकेच्या विशेष ४४४ दिवसांच्या मुदत ठेव योजनेवर सामान्य ग्राहकांना ६.६० टक्के वार्षिक व्याजदर मिळेल, तर ज्येष्ठ नागरिकांना ७.१० टक्के व्याजदर मिळेल. याशिवाय ६६६ दिवसांच्या मुदत ठेवींवर सामान्य ग्राहकांना ६.५० टक्के आणि ज्येष्ठ नागरिकांना ७ टक्के व्याजदर मिळेल. तसेच एका वर्षाच्या मुदत ठेवीसाठी सामान्य ग्राहकांना ६.२५ टक्के आणि ज्येष्ठ नागरिकांना ६.७५ टक्के व्याजदर दिला जाईल.

स्रोत: मूळ बातमी