दिवाळीच्या सुट्ट्यांमध्ये मोठ्या संख्येने प्रवासी मुंबईसह प्रमुख शहरांतून आपल्या गावी जातात. या गर्दीचा फायदा घेऊन खासगी बसचालकांकडून अवाजवी भाडे आकारले जात असल्याच्या तक्रारी दरवर्षी येतात. या पार्श्वभूमीवर परिवहन विभागाने येत्या १ ते २० नोव्हेंबरदरम्यान खासगी प्रवासी बसची विशेष तपासणी मोहीम हाती घेतली आहे. शासनाने ठरवलेल्या कमाल भाडेदरापेक्षा जास्त भाडे घेणाऱ्या बसमालकांवर कारवाई करण्याचे निर्देश प्रादेशिक आणि उपप्रादेशिक परिवहन अधिकाऱ्यांना देण्यात आले आहेत.
कमाल भाड्याची मर्यादा आणि तक्रार व्यवस्था
शासनाच्या २७ एप्रिल २०१८ च्या निर्णयानुसार खासगी कंत्राटी प्रवासी बसचे कमाल भाडे निश्चित करण्यात आले आहे. राज्य परिवहन महामंडळाच्या संबंधित संवर्गातील टप्पा वाहतुकीच्या भाडेदराचा विचार करून खासगी कंत्राटी बसचे संपूर्ण वाहनासाठीचे प्रति किलोमीटर भाडे महामंडळाच्या दराच्या ५० टक्क्यांपेक्षा जास्त असू नये, अशी मर्यादा घालण्यात आली आहे. प्रत्येक मार्गासाठी बसमालकांना आकारता येणारे कमाल भाडे आणि त्यानुसार प्रति आसन भाड्याचा तक्ता तयार करून तो बस सुटण्याच्या ठिकाणी प्रवाशांना दिसेल अशा जागी लावणे बंधनकारक आहे. तक्रारींसाठी हेल्पलाइन क्रमांकही प्रदर्शित करावा लागणार आहे. प्रवाशांना अडचणींबाबत संबंधित आरटीओ कार्यालयाच्या ई-मेलवर तक्रार नोंदवण्याची सुविधाही उपलब्ध करून दिली जाणार आहे.
सुरक्षा आणि बुकिंगची पडताळणी
केवळ भाडेवसुलीच नव्हे, तर रस्ता सुरक्षेच्या दृष्टीनेही तपासणी होणार आहे. विनापरवाना वाहतूक, क्षमतेपेक्षा जास्त प्रवासी, अवैध मालवाहतूक, योग्यता प्रमाणपत्र, वाहनातील बेकायदा फेरबदल, रिफ्लेक्टर, इंडिकेटर, टेललाइट, वायपर, अग्निशमन यंत्रणा, आपत्कालीन निर्गमन दरवाजा आणि पॅनिक बटण यांची तपासणी केली जाणार आहे. मोटार वाहन कर भरला आहे की नाही, याचीही खातरजमा केली जाईल. तपासणीत दोषी आढळणाऱ्या वाहनांवर मोटार वाहन कायदा आणि संबंधित नियमांनुसार कारवाई करून त्याचा अहवाल गुगल शीटमध्ये नोंदवण्याचे निर्देश देण्यात आले आहेत. तपासणीदरम्यान खासगी बसच्या ऑनलाइन आणि ऑफलाइन तिकीट बुकिंगचीही पडताळणी होईल. बुकिंग कार्यालयांना भेटी देऊन संगणकीय नोंदी तपासल्या जातील आणि प्रवाशांशी संवाद साधून प्रत्यक्ष आकारलेल्या भाड्याची खातरजमा केली जाईल.
स्रोत: मूळ बातमी
Leave a Reply