जेवणासोबत दही खाणे अनेकांना आवडते. मात्र रात्रीच्या जेवणात दही घ्यावे की नाही, याबाबत अनेकांच्या मनात वेगवेगळे प्रश्न असतात. काहींना रात्री दही खाणे आरोग्यासाठी चांगले वाटते, तर काहीजण ते टाळण्याचा सल्ला देतात. नेमके काय योग्य आहे आणि रात्री दही खाल्ल्याने शरीरावर काय परिणाम होतो, याची माहिती घेऊ.
आयुर्वेदाचे मत काय सांगते
आयुर्वेद आणि तज्ज्ञांच्या मते दही हे जड आणि थंड स्वरूपाचे अन्न आहे. त्यामुळे रात्रीच्या वेळी ते खाल्ल्यास शरीरात कफ वाढणे, सर्दी होणे किंवा खोकला लागण्याची शक्यता वाढते, असे सांगितले जाते. रात्री शरीराची पचनशक्ती तुलनेने मंदावलेली असते, त्यामुळे जड अन्न पचायला अधिक वेळ लागतो.
कोणत्या स्वरूपात दही घेता येईल
रात्री दही खायचे असेल तर दहीभाताच्या स्वरूपात किंवा त्याला थोडी फोडणी देऊन घेता येईल, असे तज्ज्ञ सांगतात. मात्र ज्यांना अस्थमा किंवा सर्दीचा त्रास आहे, त्यांनी रात्रीचे दही खाणे टाळावे. दह्यातील चरबी आणि प्रथिने रात्री पचायला अवघड जातात, त्यामुळे दह्याऐवजी ताक हा हलका पर्याय ठरू शकतो. ताक पचायला हलके असते. त्याचबरोबर कढी किंवा रायता हेही पर्याय घेता येतील. रात्री दही खायचे असेल आणि ते आपल्या तब्येतीला सूट होत असेल, तरच ते घ्यावे, असा सल्ला दिला जातो.
दही घेताना कोणती काळजी घ्यावी
दही खाताना एक गोष्ट आवर्जून लक्षात ठेवावी. ते घरी केलेले ताजे दही असावे. जास्त आंबट झालेले दही खाऊ नये आणि पॅकबंद स्वरूपातील दही खाणे टाळावे. ताज्या दह्यामुळे पचनाला मदत मिळते, तर आंबट किंवा शिळे दही त्रासदायक ठरू शकते. थोडक्यात, रात्री दही पूर्णपणे वर्ज्य करण्याची गरज नाही, पण त्याचे स्वरूप, प्रमाण आणि आपली तब्येत यांचा विचार करूनच ते घ्यावे.
स्रोत: मूळ बातमी
Leave a Reply