अहिल्यानगर जिल्ह्यातील नेवासा तालुक्यातील कुकाणे गावच्या लगत पूर्वेस लोंढे-गोर्डे वस्तीजवळ दिवसा बिबट्याचे दर्शन झाल्याने परिसरात भीतीचे वातावरण निर्माण झाले आहे. बिबट्याच्या संचारामुळे शेतकरी धास्तावले आहेत. या परिसरात त्वरित पिंजरा लावण्याची मागणी अंबादास कचरे यांनी केली आहे.
तुरीच्या पिकात बिबट्या आणि तीन पिल्ले
तीन दिवसांपूर्वी कुकाणे येथील शेवगाव-नेवासा राज्यमार्गालगतच्या शेतात स्वप्नील कचरे हे दुपारी झेंडू पिकावर फवारणी करण्यासाठी गेले होते. दुपारी साडेतीन वाजता त्यांना शेजारच्या अंबादास कचरे यांच्या तुरीच्या पिकात बिबट्या आणि त्याची तीन पिल्ले दिसली. चाहूल लागताच बिबट्या आणि पिल्ले शेजारच्या उसाच्या शेतामध्ये निघून गेली. सध्या कपाशी काढण्याचे काम चालू आहे, मात्र बिबट्यामुळे शेतकरी शेतात जाण्यास धजावत नाहीत. त्यामुळे वन विभागाने त्वरित पिंजरा लावून बिबट्याचा बंदोबस्त करण्याची मागणी शेतकऱ्यांकडून केली जात आहे.
पोखर्डी शिवारात बिबट्या जेरबंद
दरम्यान, अहिल्यानगर शहरानजीक असलेल्या पोखर्डी शिवारात एक बिबट्या पकडला गेला आहे. अहिल्यानगर-छत्रपती संभाजीनगर महामार्गावरील शेंडी, पोखर्डी, वडगाव गुप्ता आणि परिसरात सातत्याने बिबट्याचा वावर होता. पाळीव प्राण्यांवर हल्ला केल्याच्या घटनाही उघडकीस आल्या होत्या. त्यामुळे पोखर्डी शिवारात वनविभागाने ग्रामस्थांच्या मदतीने २८ ऑक्टोबर रोजी पिंजरा लावला होता. त्यात बिबट्या जेरबंद झाल्याने शेतकऱ्यांसह ग्रामस्थांनी समाधान व्यक्त केले आहे.
स्रोत: मूळ बातमी
Leave a Reply