सातारा जिल्ह्यातील कराड येथे युवक काँग्रेसने आमदार संजय गायकवाड यांच्या शेतकऱ्यांबाबतच्या कथित वक्तव्याविरोधात वेगळ्या पद्धतीने निषेध नोंदवला. आंदोलकांनी आमदारांचा प्रतिकात्मक पुतळा रस्त्यावर ठेवला आणि भटक्या कुत्र्यांनी त्या पुतळ्याचे लचके तोडल्याचे दाखवत आपला संताप व्यक्त केला. शेतकऱ्यांबाबत आक्षेपार्ह आणि हीन वक्तव्य केल्याचा आरोप युवक काँग्रेसने गायकवाड यांच्यावर केला आहे.
या आंदोलनात युवक काँग्रेसचे जिल्हाध्यक्ष राहुल पवार, एनएसयूआय अध्यक्ष मुबीन बागवान, माण तालुकाध्यक्ष महेश करचे, कराड दक्षिण युवक काँग्रेस अध्यक्ष चैतन्य पाटील, जितू यादव, तालुकाध्यक्ष देवदास माने, दिग्विजय जमाले आणि समीर इनामदार यांच्यासह अनेक पदाधिकारी व कार्यकर्ते सहभागी झाले होते. आंदोलनादरम्यान जोरदार घोषणाबाजी करण्यात आली आणि शेतकऱ्यांचा अपमान करणाऱ्या कोणत्याही नेत्याला यापुढे माफ केले जाणार नाही, असा निर्धार कार्यकर्त्यांनी व्यक्त केला.
शेतकऱ्यांच्या भावना दुखावल्याचा आरोप
यावेळी बोलताना महेश करचे म्हणाले की, महाराष्ट्राचा शेतकरी दिवस-रात्र कष्ट करून देशाचे पोट भरतो. मात्र त्याच शेतकऱ्याबद्दल असंवेदनशील वक्तव्य करणाऱ्या लोकप्रतिनिधींना शेतकऱ्यांच्या भावनांची किंमत नाही. शेतकरी आत्महत्या, कर्जबाजारीपणा, शेतीमालाला मिळणारा अपुरा भाव आणि नैसर्गिक संकटे यामुळे शेतकरी आधीच त्रस्त आहे. अशा स्थितीत त्यांच्या दुःखाची चेष्टा करणे अत्यंत संतापजनक असल्याचे करचे म्हणाले.
शेतकऱ्यांचा अपमान करणाऱ्या नेत्यांना आता अशाच पद्धतीने रस्त्यावर उतरून जाब विचारला जाईल, असा इशारा जिल्हाध्यक्ष राहुल पवार यांनी दिला. शेतकऱ्यांच्या जखमेवर मीठ चोळणारे वक्तव्य महाराष्ट्र कदापी सहन करणार नाही, असेही पवार म्हणाले.
२४ तासांचा इशारा
महायुतीचे आमदार संजय गायकवाड यांनी येत्या २४ तासांत महाराष्ट्रातील शेतकऱ्यांची जाहीर माफी मागावी, अशी मागणी युवक काँग्रेसने केली आहे. माफी मागितली नाही तर आणखी तीव्र आंदोलन करण्यात येईल, असा इशारा करचे यांनी दिला. माफी न मिळाल्यास आमदारांच्या विरोधात तोंडाला काळे फासून आणि भटकी कुत्री सोडून तीव्र निषेध व्यक्त करण्यास युवक काँग्रेस मागेपुढे पाहणार नाही, असे राहुल पवार म्हणाले.
स्रोत: मूळ बातमी
Leave a Reply