नवी दिल्ली येथे माध्यमांशी बोलताना काँग्रेस प्रदेशाध्यक्ष हर्षवर्धन सपकाळ यांनी मुख्य निवडणूक आयुक्त ज्ञानेशकुमार यांच्यावर जोरदार टीका केली. निवडणूक हा लोकशाहीचा आत्मा असताना निवडणूक आयोग सत्ताधारी पक्षाची कठपुतली बनून घोटाळे करत असल्याचा आरोप सपकाळ यांनी केला. निवडणुका केवळ फार्स बनल्या असून सत्ताधारी पक्षाला फायदा होईल अशा पद्धतीने आयोगाचा कारभार सुरू असल्याचे ते म्हणाले. हे लोकशाही आणि संविधानासाठी अत्यंत घातक असून त्यांच्या रक्षणासाठी विरोधी पक्षनेते राहुल गांधी यांच्या नेतृत्वाखाली इंडिया आघाडी एकत्र आली आहे, असे सपकाळ म्हणाले.
‘पहिला नंबर त्यांचाच’
मुख्य निवडणूक आयुक्त ज्ञानेशकुमार यांना जावेच लागेल, त्यांचा पहिला नंबर लागेल आणि त्यानंतर रंगा-बिल्लाचा नंबर आहे, असे घणाघाती विधान सपकाळ यांनी केले. ज्ञानेशकुमार यांना पदावरून हटवले पाहिजे आणि त्यांचा बोलविता धनी कोण आहे, हेही समजले पाहिजे, अशी मागणी त्यांनी केली. राहुल गांधी यांनी ज्ञानेशकुमार यांचा मुद्दा अत्यंत गांभीर्याने मांडला असल्याचेही ते म्हणाले.
संसदेत जनतेचे प्रश्न मांडले जातात आणि देशातील महत्त्वाच्या विषयांवर चर्चा होते, पण विरोधी पक्षाला तिथे बोलूच दिले जात नाही, असा आरोप सपकाळ यांनी केला. विरोधी पक्षनेत्यालाही बोलू दिले जात नाही हे जगाने पाहिले आहे, असे ते म्हणाले. सरकार बाहेर बुलडोझर चालवते तसेच सभागृहातही चालवते आणि सभागृहात फक्त नो-नो सुरू असते, अशी टीका त्यांनी केली. काँग्रेस अध्यक्ष मल्लिकार्जुन खरगे यांच्या निवासस्थानी मॉक पार्लमेंट घेण्यात आल्याची माहितीही त्यांनी दिली.
महारॅली आणि इतर मुद्दे
रामलीला मैदानावर १ नोव्हेंबर रोजी होत असलेल्या महारॅलीत सहभागी होण्यासाठी महाराष्ट्रातून पाच हजार लोक दिल्लीत येत असल्याचे सपकाळ यांनी सांगितले. राहुल गांधी यांच्या नेतृत्वावर सर्वांचा दृढ विश्वास असून देशाला या कठीण प्रसंगातून तेच बाहेर काढू शकतात, असे ते म्हणाले. काँग्रेसने स्वातंत्र्य चळवळीत सर्व जाती-धर्मांना एका झेंड्याखाली आणून मोठा लढा दिला होता आणि आज स्वातंत्र्य, लोकशाही व संविधान वाचवण्यासाठी पुन्हा तीच वेळ आली आहे, असे सपकाळ म्हणाले.
शिंदेसेनेचे आमदार संजय गायकवाड यांनी आत्महत्या करणाऱ्या शेतकऱ्यांबद्दल केलेले विधान अत्यंत आक्षेपार्ह आणि निषेधार्ह असल्याचे सपकाळ म्हणाले. गायकवाड सातत्याने बेताल वक्तव्य करत असतात, पण त्यांच्यावर उपमुख्यमंत्री एकनाथ शिंदे अथवा मुख्यमंत्री फडणवीस कोणतीही कारवाई करत नाहीत, असा आरोप त्यांनी केला. हा सत्तेचा माज असून तो जनताच उतरवेल, असेही ते म्हणाले. महायुतीमध्ये मोठ्या प्रमाणात अंतर्गत वाद असले तरी ते केवळ सत्तेसाठी एकत्र आहेत आणि त्यात भाजपाची दादागिरी सुरू आहे, असा टोलाही सपकाळ यांनी लगावला.
स्रोत: मूळ बातमी
Leave a Reply