जळगाव शहरातील डंपिंग ग्राउंडवरील विकासकामांचा अक्षरशः बोजवारा उडाला आहे. दोन ते तीन वर्षांपूर्वी कार्यादेश देऊनही काही कामे अद्याप सुरू झालेली नाहीत, तर सुरू असलेल्या काही कामांची प्रगती अवघी १२ ते १३ टक्क्यांवर अडकली आहे. काही कामे ६० टक्क्यांवरच रखडली असून कामांच्या गुणवत्तेबाबतही प्रश्न उपस्थित झाला आहे. या गंभीर प्रकाराची शुक्रवारी, ३० ऑक्टोबर रोजी आयुक्त, महापौर, उपमहापौर आणि स्थायी समिती सभापती यांनी प्रत्यक्ष पाहणी केली. यावेळी कामांच्या संथ गतीवर आणि ठेकेदारांच्या निष्काळजीपणावर उपमहापौरांनी संताप व्यक्त करत तीव्र नाराजी व्यक्त केली.
पाहणीदरम्यान नागरिकांचा घेराव
निमखेडी येथील घनकचरा प्रकल्पाच्या कामांची पाहणी महापौर, उपमहापौर, स्थायी समिती सभापती आणि आयुक्तांनी केली. यावेळी अतिरिक्त आयुक्त, उपायुक्त, शहर अभियंता, प्रकल्प अधिकारी आणि आरोग्य अधिकारी उपस्थित होते. पाहणीदरम्यान परिसरातील नागरिकांनी आक्रमक भूमिका घेत आयुक्तांना घेराव घातला. घनकचरा प्रकल्पाच्या संथ कामाबाबत आणि डंपिंग ग्राउंडमुळे होणाऱ्या त्रासाबाबत नागरिकांनी तक्रारींचा पाढा वाचून दाखवला. प्रशासनाकडून वारंवार आश्वासने मिळत असली तरी प्रत्यक्षात परिस्थिती बदलत नसल्याचा संताप त्यांनी व्यक्त केला.
ठेकेदाराला अंतिम नोटीस देण्याचा इशारा
पाहणीची पूर्वसूचना देऊनही काही ठेकेदार घटनास्थळी उपस्थित नव्हते. दोन ते तीन वर्षांचा कालावधी उलटूनही कामे सुरू न होणे किंवा केवळ १२ ते १३ टक्क्यांपर्यंतच प्रगती होणे ही बाब प्रशासनासाठी गंभीर ठरली. यापूर्वी सूचना देऊनही कामांत सुधारणा न झाल्याने संबंधित अधिकारी आणि अभियंत्यांनाही जाब विचारण्यात आला. कार्यादेश मिळूनही कामे सुरू न करणाऱ्या ठेकेदारांकडून तातडीने कामे सुरू करून घ्यावीत आणि अपूर्ण कामांना गती देऊन निर्धारित मुदतीत ती पूर्ण करावीत, असे कडक निर्देश वरिष्ठांनी दिले. कामांच्या गुणवत्तेशी तडजोड सहन केली जाणार नाही, असेही स्पष्ट करण्यात आले. मक्तेदाराला वारंवार सूचना देऊनही अपेक्षित काम होत नसल्याने महापालिका प्रशासनाकडून त्यांना अंतिम नोटीस दिली जाणार असल्याचे आयुक्तांनी सांगितले.
स्रोत: मूळ बातमी
Leave a Reply