दिवाळीच्या काळात दुकानांमध्ये मिठाईवर सवलत किंवा कपड्यांवर सूट देणे नेहमीचे असते. पण एका दुकानदाराने यापेक्षा वेगळीच भन्नाट शक्कल लढवली आहे. त्याने दुकानात उलटी लटकवलेली बाईक दाखवून ग्राहकांना एक आव्हान दिले आहे. त्या उलट्या बाईकवर बसून दाखवा आणि बाईक मोफत घरी घेऊन जा, अशी त्याची ऑफर आहे. ही कल्पना सध्या सोशल मीडियावर प्रचंड चर्चेत आहे.
मिळालेल्या माहितीनुसार, हा प्रकार ब्राझीलमधील पेड्रो सेंगुडो येथील एका मोठ्या शोरूमच्या उद्घाटनाशी संबंधित आहे. दुकानाकडे लोकांचे लक्ष वेधून घेण्यासाठी मालकाने ही युक्ती आखली. दुकानाच्या प्रवेशद्वाराजवळ निळ्या रंगाची एक बाईक छताला उलटी लटकवण्यात आली. त्याशेजारी एक फलक लावण्यात आला. त्यावर लिहिले होते की, बाईक मोफत हवी असेल तर या उलट्या बाईकवर बसून दाखवा.
अट होती दहा मिनिटे टिकून राहण्याची
या आव्हानाची अटही तितकीच कठीण होती. उलट्या लटकवलेल्या बाईकवर हात आणि पायांच्या मदतीने स्वतःला सावरत दहा मिनिटे टिकून राहायचे होते. जो कोणी हे आव्हान पूर्ण करेल, त्याला ती बाईक बक्षीस म्हणून एकही पैसा न घेता दिली जाणार होती. व्हायरल झालेल्या व्हिडिओमध्ये अनेक लोक हे आव्हान स्वीकारताना दिसतात. मात्र, त्यांचे बहुतांश प्रयत्न अयशस्वी ठरल्याचे दिसून येते.
बाईक कुणाला मिळाली, हे अजून स्पष्ट नाही
हा व्हिडिओ सोशल मीडिया प्लॅटफॉर्मवर शेअर झाल्यानंतर अनेकांनी आश्चर्य व्यक्त केले आहे. काहींनी दुकानदाराच्या मार्केटिंग कल्पनेचे कौतुक केले आहे, तर काहींनी उलट्या बाईकवर दहा मिनिटे टिकून राहणे अशक्य असल्याचे म्हटले आहे. मात्र, या व्हिडिओमध्ये आव्हान पूर्ण करून कुणी बाईक जिंकल्याचे दिसत नाही. त्यामुळे बाईक नेमकी कुणाला मिळाली, याची अधिकृत माहिती अद्याप समोर आलेली नाही. सध्या तरी ही भन्नाट मार्केटिंग आयडिया चर्चेचा विषय बनली आहे.
स्रोत: मूळ बातमी
Leave a Reply