नाशिक शहरात येत्या शनिवारी होणाऱ्या सिंहस्थ ध्वजारोहणाच्या विशेष सोहळ्याच्या पार्श्वभूमीवर सुरक्षा व्यवस्था अधिक कडक करण्यात आली आहे. राष्ट्रपतींच्या प्रमुख उपस्थितीत हा सोहळा पार पडणार असल्याने शहराला जणू पोलीस छावणीचे स्वरूप आले आहे. पंचवटी आणि जुन्या नाशिक भागात विशेष बंदोबस्त तैनात करण्यात आला आहे. या सोहळ्याला राज्यपाल, मुख्यमंत्री यांच्यासह मंत्री, खासदार व आमदारही उपस्थित राहणार आहेत.
केंद्रीय यंत्रणांची पथके नाशिकमध्ये
सुरक्षेचा भाग म्हणून गुप्तचर यंत्रणा, राष्ट्रीय सुरक्षा रक्षक दल, दहशतवादविरोधी पथक आणि विशेष तपास पथकांचे अधिकारी व जवान शहरात दाखल झाले आहेत. गोदाघाटाचा संपूर्ण परिसर राष्ट्रीय सुरक्षा रक्षक दलाच्या ताब्यात देण्यात आला आहे. शहरातील प्रत्येक घडामोडीवर आणि संशयास्पद हालचालींवर यंत्रणांची करडी नजर आहे.
दहशतवादविरोधी पथक आणि स्थानिक पोलिसांनी संयुक्त मोहीम राबवत शहरातील हॉटेल्स व लॉजेसची कसून तपासणी सुरू केली आहे. तेथे थांबलेल्या प्रत्येक व्यक्तीची सखोल चौकशी केली जात आहे. बसस्थानके, रेल्वेस्थानक आणि मुख्य बाजारपेठांमध्येही कडक पोलीस बंदोबस्त ठेवण्यात आला आहे. वाहतूक सुरळीत राहावी यासाठी स्वतंत्र नियोजन करण्यात आले आहे.
गोदाघाट परिसरात शंभराहून अधिक बॅरिकेड्स
सोहळ्याचे मुख्य ठिकाण आणि संपूर्ण गोदाघाट परिसरात कडेकोट पहारा देण्यात येत आहे. गोदाघाटाभोवती शंभराहून अधिक ठिकाणी बॅरिकेटींग करण्यात आले असून विविध ठिकाणी सशस्त्र पोलीस तैनात आहेत. पंचवटी आणि जुन्या नाशिक परिसरातील मुख्य रस्त्यांवर नाकाबंदी करण्यात आली आहे.
नागरिकांची गैरसोय टाळण्यासाठी आणि सोहळा शांततेत पार पाडण्यासाठी पोलीस प्रशासनाने विशेष मार्गदर्शक सूचना जारी केल्या आहेत. वाहतुकीच्या मार्गातही तात्पुरते बदल करण्यात आले आहेत. सोहळ्यावर लक्ष ठेवण्यासाठी सुमारे शंभर ते दीडशे उच्च दर्जाचे एआय आधारित सीसीटीव्ही कॅमेरे बसविण्यात आले आहेत.
सुरक्षा व्यवस्थेत स्थानिक पोलिसांचे तीन हजार अधिकारी व अंमलदार, परजिल्ह्यातील दीड हजार अतिरिक्त कर्मचारी, एक हजार गृहरक्षक दलाचे जवान आणि सातशे वाहतूक अधिकारी व अंमलदार यांचा समावेश आहे.
स्रोत: मूळ बातमी
Leave a Reply