शिक्षक आणि पदवीधर मतदारसंघांच्या निवडणुकीच्या निकालानंतर सत्ताधारी महायुतीत वादाची ठिणगी पडली आहे. या निवडणुकीत महाविकास आघाडीने तीन जागा जिंकल्या, तर महायुतीला केवळ दोन जागांवर समाधान मानावे लागले. या पराभवानंतर भाजपने थेट मित्रपक्ष शिवसेनेवर खापर फोडले आहे.
शिवसेनेकडून अपेक्षित सहकार्य मिळाले नाही, भाजपचा आरोप
भाजपचे मुख्य प्रवक्ते नवनाथ बन यांनी निवडणुकीत शिवसेनेकडून अपेक्षित सहकार्य मिळाले नसल्याचा गंभीर आरोप केला आहे. पुणे आणि नागपूरसारख्या महत्त्वाच्या ठिकाणी मित्रपक्षांकडून पाठिंबा न मिळाल्याने महायुतीचे नुकसान झाल्याचे भाजपचे म्हणणे आहे.
पुण्यात शिवसेनेने ऐनवेळी सचिन सानप यांना पाठिंबा दिला, त्यामुळे महायुतीची एकजूट ढासळली आणि भाजपला मिळणारी मते विभागली गेली, असा दावा बन यांनी केला आहे. छत्रपती संभाजीनगरमध्ये अब्दुल सत्तार यांनी थेट राष्ट्रवादी काँग्रेसच्या विरोधात प्रचार केल्याचाही फटका बसल्याचे भाजपने म्हटले आहे.
पाचही जागा जिंकता आल्या असत्या, भाजपचा दावा
शिवसेनेने युतीधर्म पाळून भाजप आणि राष्ट्रवादीला सहकार्य केले असते, तर महायुतीने पाचही जागांवर विजय मिळवला असता, असा दावा भाजपने केला आहे. मात्र, पुण्यात एका जागेच्या हव्यासापोटी शिवसेनेने मित्रपक्षांना अडचणीत आणले आणि तीन जागांवरील विजयाची संधी गमावली, असे नवनाथ बन यांनी म्हटले आहे. एका जागेसाठी मित्रपक्षांचे नुकसान करण्याची भूमिका महायुतीच्या हिताची नसल्याचेही त्यांनी स्पष्ट केले. या आरोपांमुळे महायुतीतील वाद आता उघडपणे समोर आला आहे.
स्रोत: मूळ बातमी
Leave a Reply