मुंबईतील एका पुस्तक प्रकाशनाच्या कार्यक्रमाला ठाकरे बंधू आणि मुख्यमंत्री देवेंद्र फडणवीस यांनी एकत्र हजेरी लावली. खेळीमेळीच्या वातावरणात हा कार्यक्रम संपन्न झाला. या कार्यक्रमाआधी ठाकरे बंधू आणि मुख्यमंत्री फडणवीस यांच्यात बंद दाराआड चर्चा झाली. त्यामुळे राजकीय वर्तुळात उलटसुलट चर्चा सुरू झाली. या भेटीवर मंत्री गुलाबराव पाटील यांनी पहिली प्रतिक्रिया दिली आहे.
चहा प्यायला बसले होते
बंद दाराआड चर्चेवर गुलाबराव पाटील यांनी मिश्किल उत्तर दिले. ते एकत्र चहा प्यायला बसले होते, असे मला सूत्रांकडून कळले, असे उत्तर मंत्री गुलाबराव पाटील यांनी दिले. माध्यमांशी संवाद साधताना त्यांनी अनेक मुद्द्यांवर भाष्य केले. भाजप-शिंदे गटाच्या वादावर ते म्हणाले की, त्या ठिकाणच्या निवडणुकीच्या प्रक्रियेमध्ये स्थानिक पदाधिकारी होते. त्यामुळे या गोष्टी स्थानिक पदाधिकाऱ्यांना माहिती आहेत. पक्ष या गोष्टीचा अहवाल मागत असतो, त्यानुसार पक्ष अहवाल मागवेल आणि पुढे काय करायचे ते करेल.
इतर मुद्द्यांवरही भूमिका
नवनाथ बन यांच्या टीकेवर गुलाबराव पाटील म्हणाले की, एका व्यक्तीने म्हटले म्हणजे पक्षाने म्हटले असे होत नाही. नवनाथ बन हे शेवटी प्रवक्ता आहेत. शेवटी निर्णय घेण्याचे अधिकार मुख्यमंत्री आणि उपमुख्यमंत्री यांना असतात. सुप्रीम कोर्टाच्या निवडणुकीबाबतच्या आदेशावर ते म्हणाले की, कोर्टाच्या निर्णयाच्या बाहेर कोणाला जाता येत नाही. कोर्ट जो निर्णय देईल, तो सर्वांना अंमल करावा लागेल. उद्धव ठाकरे आणि एकनाथ शिंदे यांच्या एकत्र येण्याबाबतच्या दाव्यावर गुलाबराव पाटील म्हणाले की, हे धंगेकरांचे व्यक्तिगत मत असावे, असे मला वाटते. या वेळी त्यांनी राज ठाकरे यांच्यावर भाष्य करणे टाळले. जळगाव जिल्हा बँक निवडणुकीवर ते म्हणाले की, जिल्हा बँक निवडणूक बिनविरोध व्हावी, अशी आमची भूमिका आहे. काँग्रेसने जी भूमिका मांडली, तीच आमची भूमिका आहे. जिल्हा बँक निवडणूक बिनविरोध झाली पाहिजे.
स्रोत: मूळ बातमी
Leave a Reply