नाशिकमध्ये एचआयव्ही सहजीवन जगणाऱ्या व्यक्तींसाठी आयोजित करण्यात आलेल्या राज्यस्तरीय वधूवर परिचय मेळाव्यात पाच विवाहइच्छुकांची रेशीमगाठ जुळली. यामध्ये दोन विधवा महिलांना जोडीदार मिळाला आहे. कर्करोग, टीबी, रक्तदाब, मधुमेह अशा आजारांकडे सहानुभूतीने पाहिले जाते, मात्र एचआयव्ही बाधित व्यक्तीकडे समाजाचा दृष्टिकोन वेगळा असतो. गेल्या काही वर्षांत मात्र आधुनिक उपचार पद्धतींमुळे परिस्थिती बदलली असून एचआयव्ही बाधितांचे प्रमाण घटले आहे.
१५० उमेदवार, चारशे पालकांची उपस्थिती
एनएनपी प्लस, एनजीओ फोरम, प्रेम फाउंडेशन आणि तुळसाई बहुउद्देशीय संस्था यांच्या संयुक्त विद्यमाने सर्व जातीय एचआयव्ही सहजीवन जगणाऱ्या व्यक्तींचा ‘ऋणानुबंध’ राज्यस्तरीय वधूवर परिचय मेळावा रोटरी क्लब हॉल येथे आयोजित करण्यात आला होता. या मेळाव्यात अहिल्यानगर, नांदेड, मुंबई, पुणे, छत्रपती संभाजीनगर, जालना आणि बुलढाणा जिल्ह्यातून १५० विवाहइच्छुक उमेदवारांसह चारशे पालक उपस्थित होते. मेळाव्याचे उद्घाटन महिला व बाल विकास उपायुक्त चंद्रशेखर पगारे यांच्या हस्ते करण्यात आले.
आत्तापर्यंत बारा मेळावे, दृष्टिकोनात बदल
रक्त संक्रमण आणि असुरक्षित लैंगिक संबंधांमुळे एचआयव्हीची बाधा होत असल्याने याकडे पूर्वी बदनाम आजार म्हणून पाहिले जात होते. आता मात्र परिस्थिती पूर्णपणे बदलली आहे. आई-वडील बाधित असले तरी होणारे बाळ पूर्णपणे निरोगी जन्माला येऊ शकते. त्यामुळे बाधित व्यक्तींची लग्ने जुळतात आणि समाजाचा त्यांच्याकडे पाहण्याचा दृष्टिकोन बदलला आहे. आत्तापर्यंत झालेल्या बारा ‘ऋणानुबंध’ राज्यस्तरीय वधूवर परिचय मेळाव्यांमधून अनेक रेशीमगाठी जुळल्या असून, एचआयव्ही बाधित व्यक्ती आनंददायी आणि निरोगी आयुष्य जगत आहेत.
स्रोत: मूळ बातमी
Leave a Reply