दसरा संपताच नागरिकांना दिवाळीचे वेध लागले आहेत. नाशिकच्या बाजारपेठेत आकर्षक आणि विविधरंगी आकाशकंदील विक्रीस दाखल झाले असून, संपूर्ण बाजारपेठ कंदिलांनी सजली आहे. नावीन्यपूर्ण आकार, प्रकार आणि डिझाइनमध्ये आकाशकंदील उपलब्ध असून, पारंपारिक, टिकाऊ आणि इको-फ्रेंडली कंदिलांना सर्वाधिक मागणी होत आहे.
तीन इंचांपासून सहा फुटांपर्यंत कंदील
बाजारात तीन इंचांपासून ते सहा फुटांपर्यंतचे आकाशकंदील विक्रीस आले आहेत. षटकोनी, डायमंड, स्टार, चौकोन, खणाचे कंदील, तसेच वॉटरप्रूफ आणि मॅजिक स्टार अशा विविध प्रकारांतील कंदील ग्राहकांना मिळत आहेत. खणाची साडी, वेलवेट कापड, रंगबिरंगी कापड, बांबूपासून तयार केलेल्या कामट्या, पुठ्ठा, ज्युट, ओली पेपर, लेस आणि रेशमी दोरी यांचा वापर कंदील बनवण्यासाठी केला जातो. बाजारात पन्नास रुपये डझनपासून ते पाच हजार रुपयांपर्यंत एक या दराने आकाशकंदील विकले जात आहेत.
किमतीत वाढ, तरीही खरेदीचा उत्साह
कच्च्या मालाचे दर वाढल्यामुळे आकाशकंदिलांच्या किमतीत दहा टक्क्यांनी वाढ झाली आहे. एका विक्रेत्याच्या मते, गेल्या वर्षीच्या तुलनेत दरात तीस ते चाळीस टक्के वाढ झाली असली तरी इको-फ्रेंडली आणि फॅन्सी कंदिलांना अधिक मागणी आहे. नाशिकमधून अन्य जिल्ह्यांमध्येही आकाशकंदील पाठवले जात आहेत; त्यामुळे हे शहर सध्या आकाशकंदिलांचे माहेरघर ठरत आहे. पूर्वी चीनमधून कमी दरातील आकाशकंदील बाजारात येत असत. मात्र चिनी वस्तूंवरील बंदीमुळे गेल्या दोन वर्षांपासून बाजारात चिनी आकाशकंदील दिसून येत नाहीत. परिणामी पारंपारिक आकाशकंदिलांच्या मागणीत मोठी वाढ झाली असून, त्याबद्दल कंदील विक्रेत्यांनी समाधान व्यक्त केले आहे.
स्रोत: मूळ बातमी
Leave a Reply