छत्रपती संभाजीनगर जिल्ह्यातील पैठण तालुक्यातील गावतांडा गावचे शेतकरी कैलास कुंटेवार यांची कहाणी अनेकांच्या मनाला भिडणारी आहे. लोकप्रिय प्रश्नमंजुषा कार्यक्रमात त्यांनी ५० लाख रुपयांचे बक्षीस जिंकले होते. या रकमेमुळे आपले आयुष्य बदलेल, अशी त्यांना आशा होती. मात्र यंदाच्या दुष्काळाने त्या आशेवर पाणी फिरवले.
बक्षिसाची रक्कम शेतीत गुंतवली
कुंटेवार यांच्याकडे अवघी दोन एकर शेती आहे. स्वतःच्या शेतात काम करण्याबरोबरच ते उदरनिर्वाहासाठी कष्ट करतात. कार्यक्रमातून मिळालेली रक्कम त्यांनी शेतीत गुंतवण्याचा निर्णय घेतला. या पैशातून त्यांनी विहीर खोदली आणि शेतात कापूस व सोयाबीनची लागवड केली. शेतीतून चांगले उत्पन्न मिळेल आणि कुटुंबाचे भवितव्य सुधारेल, अशी त्यांची अपेक्षा होती.
दुष्काळामुळे पदरी निराशा
मात्र प्रत्यक्षात वेगळेच घडले. खोदलेल्या विहिरीला पाणी लागले नाही. कापसाच्या पिकाला बोंडं आली नाहीत आणि सोयाबीनचेही नुकसान झाले. त्यामुळे उत्पन्नाऐवजी त्यांच्या पदरी निराशाच पडली. मोठे बक्षीस जिंकूनही दुष्काळाच्या झळा त्यांना बसल्या आणि त्यांची कहाणी मराठवाड्यातील शेतकऱ्यांच्या अडचणींचे प्रतीक ठरली आहे.
Leave a Reply