जळगावच्या परिवर्तन संस्थेच्या शिरपेचात आणखी एक मानाचा तुरा खोवला गेला आहे. महाराष्ट्रातील प्रायोगिक रंगभूमीवर सातत्याने दर्जेदार काम करणाऱ्या नाट्यसंस्थांना दिला जाणारा रवींद्र दामले पुरस्कार यंदा परिवर्तन संस्थेला मिळाला आहे. पुण्यातील महाराष्ट्र कल्चरल सेंटरकडून हा प्रतिष्ठेचा पुरस्कार दिला जातो.
पुण्यातील श्रीराम लागू रंगमंच ‘अवकाश’ या नाट्यगृहात झालेल्या समारंभात हा पुरस्कार प्रदान करण्यात आला. प्रसिद्ध रंगकर्मी चंद्रकांत काळे आणि ज्येष्ठ अभिनेते मोहन आगाशे यांच्या हस्ते हा सन्मान देण्यात आला. परिवर्तनच्या वतीने संस्थेतील महिला कलावंतांनी हा पुरस्कार स्वीकारला. रेखा बाविस्कर, सोनाली पाटील, माधुरी बर्वे, अंजली धुमाळ, रजिता राजेश शिर्के, हर्षदा कोल्हटकर, प्रतीक्षा कल्पराज आणि नेहा पवार यांचा त्यात समावेश होता.
प्रायोगिक रंगभूमीवरील योगदानाचे कौतुक
चंद्रकांत काळे यांनी परिवर्तनच्या कामाचे कौतुक करताना शंभू पाटील आणि त्यांची संस्था ही रंगभूमीवरील आशादायी चित्र असल्याचे सांगितले. प्रायोगिक रंगभूमी पुढे नेण्याचे महत्त्वाचे काम परिवर्तन करत असल्याचे त्यांनी नमूद केले.
पुरस्कार स्वीकारल्यानंतर शंभू पाटील यांनी नाटक आणि नाट्यसंस्थेचे काम हे एकट्या-दुकट्याचे नसून त्यासाठी अनेकांचे सहकार्य लागते, अशी भावना व्यक्त केली. ज्येष्ठ साहित्यिक भालचंद्र नेमाडे, अशोक जैन व जैन उद्योग समूह, श्रीकांत देशमुख, नंदू माधव, संदीप मेहता, विजय बाविस्कर, नारायण बाविस्कर, मंजूषा भिडे, हर्षल पाटील यांच्यासह अनेक सहकाऱ्यांचे त्यांनी आभार मानले.
ज्येष्ठ रंगकर्मींचाही गौरव
याच समारंभात ज्येष्ठ रंगकर्मी सुनील शानबाग यांना अधिष्ठाता पुरस्कार, तर अनुष्का आपटे यांना सई भागवत पुरस्कार देण्यात आला. पुरस्कार वितरणानंतर यंदाच्या राज्य नाट्य स्पर्धेत प्रथम क्रमांक पटकावलेल्या ‘दगडी भिंत’ या नाटकाचा प्रयोग सादर झाला. अतुल पेठे, अनिरुद्ध खुटवड, विजय बाविस्कर, समर नखाते, आशुतोष पोतदार, शिरीष बर्वे यांच्यासह अनेक मान्यवर यावेळी उपस्थित होते.
स्रोत: मूळ बातमी
Leave a Reply