दिवाळीच्या सुट्यांमध्ये गावी जाण्यासाठी आणि पर्यटनासाठी बाहेर पडणाऱ्या जळगावकरांची लगबग वाढली आहे. त्यामुळे मुंबई आणि पुण्याहून जळगावकडे येणाऱ्या रेल्वेगाड्यांचे आरक्षण पूर्ण झाले असून, जळगाव विमानतळावरून सुटणाऱ्या पुणे, हैदराबाद आणि गोवा या तिन्ही मार्गांवरील विमानसेवांनाही प्रवाशांचा चांगला प्रतिसाद मिळत आहे. दिवाळीपूर्वीचे आणि सुट्यांनंतरचे काही दिवसांचे आरक्षण संपल्याने प्रवाशांना उपलब्ध तिकिटांसाठी आधीपासून नियोजन करावे लागत आहे.
विमान प्रवासाला वाढती पसंती
गेल्या दोन वर्षांत जळगाव विमानतळावरून सुरू झालेल्या विमानसेवांनी जळगावकरांना प्रवासाचे नवे पर्याय दिले आहेत. दिवाळीच्या पार्श्वभूमीवर तिन्ही मार्गांवर तिकिटांची मागणी वाढली आहे. पुणे-जळगाव मार्गावर ३ ते ७ नोव्हेंबरदरम्यान आरक्षण पूर्ण झाले आहे. जळगावहून पुण्याला जाण्यासाठी १० ते १५ नोव्हेंबरदरम्यान तिकिटांचे दर पाच ते सात हजार रुपयांपर्यंत पोहोचले आहेत. हैदराबाद मार्गावरही नोव्हेंबरमधील काही दिवसांचे दर वाढले असून, २ आणि ११ नोव्हेंबरच्या प्रवासासाठी आरक्षण उपलब्ध नसल्याचे तिकीट संकेतस्थळांवरील माहितीतून दिसते.
गोव्याकडे पर्यटकांचा ओढा
दिवाळीच्या सुट्यांमध्ये गोव्याला जाण्यासाठी जळगावकर विशेष पसंती देत आहेत. जळगाव-गोवा विमानसेवेसाठी १ ते १७ नोव्हेंबरदरम्यान तिकिटांची मागणी वाढली आहे. साधारण तीन ते साडेतीन हजार रुपये असलेले तिकीट आता पाच ते आठ हजार रुपयांपर्यंत गेले आहे. २ नोव्हेंबरला गोव्याहून जळगावला येणाऱ्या विमानातील सर्व तिकिटे विकली गेली असून, १२ नोव्हेंबरच्या जळगाव-गोवा विमानाचेही आरक्षण पूर्ण झाले आहे.
रेल्वे आरक्षणही फुल्ल
मध्य रेल्वे विभागाने नियमित गाड्यांसोबतच दिवाळी विशेष गाड्या मोठ्या प्रमाणात सुरू केल्या आहेत. मात्र, नियमित गाड्यांसह दिवाळी विशेष गाड्यांचेही आरक्षण पूर्ण झाल्याचे तिकीट आरक्षण यादीत दिसून येत आहे. रेल्वे आणि विमानसेवांमधील वाढती मागणी पाहता दिवाळीच्या सुट्यांसाठी प्रवाशांनी प्रवासाचे नियोजन आधीच करणे आवश्यक ठरत आहे.
स्रोत: मूळ बातमी
Leave a Reply