पवना धरणाचे पाणी रावेतपर्यंत पोहोचेना, पुरवठा विस्कळित

पिंपरी शहराला पाणीपुरवठा करणाऱ्या व्यवस्थेत अडचण निर्माण झाली आहे. पवना धरणातून पाणी सोडले जात असले तरी ते रावेत बंधाऱ्यापर्यंत आवश्यक प्रमाणात पोहोचत नाही. बंधाऱ्यातील पाणीपातळी घसरल्याने शहराचा पाणीपुरवठा विस्कळित झाला आहे. महापालिकेचे अधिकारी पाणीचोरीकडे बोट दाखवत आहेत, तर जलसंपदा विभागाचे अधिकारी दहा टक्के कपात करून पाणी सोडत असल्याचे सांगत आहेत.

पवना धरणातून नदीपात्रात सोडलेले पाणी रावेत बंधाऱ्यातून उचलून महापालिका शहराला पुरवते. बंधाऱ्यातील पाणीपातळी कमी झाल्याने या व्यवस्थेलाच फटका बसला आहे. शहरातील काही भागांचा पुरवठा विस्कळित झाला असून, काही ठिकाणी पाण्याच्या वेळा अचानक बदलल्या आहेत. आधीच दिवसाआड पाण्याची वाट पाहणाऱ्या नागरिकांना आता बदललेल्या वेळापत्रकाचाही सामना करावा लागत आहे.

पाणी किती पोहोचते याचे गणित

कपातीपूर्वी महापालिका पवनेतून दररोज ५४० दशलक्ष लिटर पाणी उचलत होती. या प्रमाणावर दहा टक्के कपात म्हणजे ५४ दशलक्ष लिटरची घट होते. त्यानुसार पवनेतून उपलब्ध होणाऱ्या पाण्याचे गणिती प्रमाण ४८६ दशलक्ष लिटर ठरते. मात्र, रावेतमध्ये प्रत्यक्ष किती पाणी पोहोचले आणि महापालिकेने किती उचलले, याच आकड्यांत सध्याच्या विस्कळित पुरवठ्याचे उत्तर दडले आहे, असे सांगितले जात आहे.

धरणातून दररोज पाणी सोडण्यात येत असून त्याची दैनंदिन नोंदही ठेवण्यात येते, असे पवना धरणाचे शाखा अभियंता रजनीश बारिया यांनी सांगितले. कपातीपूर्वी ५४० दशलक्ष लिटर पाणी सोडले जात होते आणि दहा टक्के कपातीनंतर ४८६ दशलक्ष लिटर पाणी सोडले जात आहे, अशी त्यांनी माहिती दिली.

पाणीचोरीचा शोध घेणार महापालिका

पवना धरण ते रावेत पंपिंग स्टेशनदरम्यान पाणीचोरी होत असल्याचे महापालिका अधिकाऱ्यांचे म्हणणे आहे. शहरासाठी सोडलेल्या पाण्याचा अनधिकृत उपसा नेमका कुठे होतो, तो कोण करतो आणि किती पाणी चोरले जाते, याबाबत प्रश्न उपस्थित होत आहेत. पाणीचोरीचे कारण सांगून प्रशासनाची जबाबदारी संपत नाही, तर चोरी रोखून शहराचे पाणी रावेतपर्यंत पोहोचवण्याची जबाबदारी कोण स्वीकारणार, असाही सवाल उपस्थित होत आहे.

रावेत येथील जलउपसा केंद्रावरील पाणीपातळी शुक्रवारी अचानक कमी झाली असून धरणातून येणारे पाणी कमी आल्याचा अंदाज आहे, असे महापालिकेचे सहशहर अभियंता अजय सूर्यवंशी यांनी सांगितले. पवना नदीतूनच पाणीचोरी होत असल्याची शंका असून त्यासाठी शोधपथके तैनात करण्यात येणार आहेत आणि पाणीचोरीचा शोध घेण्यात येणार आहे, असे त्यांनी सांगितले.

स्रोत: मूळ बातमी