लोकप्रिय प्रश्नमंजुषा कार्यक्रमाच्या अठराव्या पर्वाला पहिला कोट्यधीश मिळाला आहे. जळगाव जिल्ह्यातील बलवाडी गावचा भूषण ठाकरे हा तरुण एक कोटी रुपयांचा मानकरी ठरला आहे. स्वतःच्या हुशारीच्या आणि चिकाटीच्या बळावर त्याने ही रक्कम जिंकली असून आता तो सात कोटी रुपयांच्या प्रश्नापर्यंत पोहोचला आहे. त्याचा हा प्रवास अनेकांसाठी प्रेरणादायी ठरत आहे.
## २४ रुपये खिशात घेऊन मुंबईत
भूषण अवघ्या २८ वर्षांचा आहे. स्पर्धा परीक्षांची तयारी करणाऱ्या या तरुणाला आयुष्यात काहीतरी मोठं करून दाखवायचं आहे. याच स्वप्नासाठी तो गेल्या काही काळापासून घरापासून दूर राहून संघर्ष करत आहे. मोठी स्वप्नं उराशी बाळगून तो एकेकाळी खिशात अवघे २४ रुपये घेऊन मुंबईत आला होता. परिस्थिती कितीही कठीण असली तरी काहीतरी करून दाखवायचंच, हा त्याचा निर्धार होता.
## आई-वडिलांना दिलेलं वचन
हॉटसीटवर बसल्यानंतर भूषणने आपल्या आयुष्यातील संघर्षाची कहाणी कार्यक्रमाचे सूत्रसंचालक अमिताभ बच्चन यांच्यासमोर सांगितली. तो गेल्या दीड वर्षांपासून घरी गेलेला नाही. आयुष्यात काहीतरी चांगलं करून दाखवल्याशिवाय घरी परतणार नाही, असं वचन त्याने आपल्या आई-वडिलांना दिलं होतं.
भूषणच्या कुटुंबाची आर्थिक परिस्थिती फारशी चांगली नव्हती. त्याचे वडील रोजंदारीवर मजुरीचं काम करायचे, तर आईची प्रकृती नेहमीच खराब असायची. तिच्यावर अनेक शस्त्रक्रियाही झाल्या आहेत. घरातील आर्थिक अडचणी असूनही वडिलांनी भूषणच्या शिक्षणात कोणतीही कमतरता भासू दिली नाही. स्वतः कष्ट करून त्यांनी पत्नीची काळजी घेतली आणि मुलाचं शिक्षणही पूर्ण केलं.
वडील मजुरी करत असले तरी त्यांनी भूषणला कधीही तेच काम करण्यासाठी दबाव टाकला नाही. उलट त्यांनी त्याला शिक्षण पूर्ण करण्यासाठी प्रोत्साहन दिलं. एकदा भूषणला आपणही काहीतरी काम करून कुटुंबाला हातभार लावावा असं वाटलं. त्यामुळे त्याने गावातील नदीवर काम करण्यास सुरुवात केली. मात्र, वडिलांना ही गोष्ट मान्य नव्हती. त्यांनी त्याला एकतर घरी राहून अभ्यास कर किंवा शिक्षण पूर्ण कर, असं सांगितलं.
भूषणच्या संघर्षाची कहाणी ऐकून अमिताभ बच्चन यांनीही त्याच्या यशाचं कौतुक केलं. त्याच्या कहाणीनं ते भावूक झाल्याचंही कार्यक्रमाच्या प्रोमोमध्ये पाहायला मिळतं. आता भूषण सात कोटींची रक्कम जिंकणार की नाही, हे पाहणं उत्सुकतेचं ठरणार आहे.
Leave a Reply