सध्या सोशल मीडियावर एका गाण्याची जोरदार चर्चा सुरू आहे. इन्स्टाग्राम रील्सपासून ते यूट्यूबपर्यंत सर्वत्र ‘दिलरुबा दिलनशीं’ या गाण्याची धूम पाहायला मिळत आहे. या गाण्यातील सुरेल आवाजाने अनेकांना भुरळ घातली आहे. या गाण्याचा गायक रितो रिबा याचा प्रवासही तितकाच प्रेरणादायी आहे. एकेकाळी इंडियन आयडॉलच्या मंचावरून बाहेर पडलेल्या या गायकाने आज स्वतःच्या आवाजाच्या जोरावर देशभरात लोकप्रियता मिळवली आहे.
कोण आहे रितो रिबा?
रितो रिबा हा अरुणाचल प्रदेशातील पासीघाट येथे राहणारा आहे. तो गालो या आदिवासी समुदायाशी संबंधित आहे. त्याचे बालपण अरुणाचल प्रदेशमध्ये गेले. त्याच्या घरातच संगीताचे वातावरण होते. त्याच्या आईला लोकगीते गाण्याची आवड होती. त्यामुळे लहानपणापासूनच त्याला संगीताची आवड निर्माण झाली. त्याच्या वडिलांनाही गाण्याची आणि गिटार वाजवण्याची आवड होती.
रितोने संगीत क्षेत्रात येण्यासाठी कोणताही मोठा प्लॅटफॉर्म किंवा प्रसिद्धीचा मार्ग निवडला नव्हता. २०१४-१५ च्या सुमारास महाविद्यालयात शिक्षण घेत असताना त्याने यूट्यूबवर गाण्यांचे कव्हर व्हिडीओ अपलोड करण्यास सुरुवात केली. सुरुवातीला तो स्वतःचा चेहराही व्हिडीओमध्ये दाखवत नव्हता. मात्र, हळूहळू त्याला स्वतःची गाणी लिहिण्याची आणि त्या गाण्यांना संगीत देण्याची इच्छा निर्माण झाली. त्यानंतर त्याने स्वतःच्या संगीताची वेगळी ओळख निर्माण करण्यावर भर दिला.
इंडियन आयडॉलचा प्रवास
रितो रिबाच्या आयुष्यातील महत्त्वाचा टप्पा म्हणजे २०२२ मधील ‘इंडियन आयडॉल सीझन १३’. या शोमध्ये सहभागी होण्यासाठी तो मुंबईत आला होता. ऑडिशनच्या वेळी त्याने स्वतः लिहिलेले ‘हीर रांझणा’ हे गाणे सादर केले. तसेच गालो भाषेतील गाणेही गाऊन दाखवले. त्याच्या आवाजातील वेगळेपणा आणि गाण्याच्या सादरीकरणाने परीक्षकांचे लक्ष वेधून घेतले.
या सीझनमध्ये नेहा कक्कर, विशाल ददलानी आणि हिमेश रेशमिया परीक्षक होते. रितोच्या ऑडिशनचा व्हिडीओ सोशल मीडियावर मोठ्या प्रमाणात व्हायरल झाला. अनेकांना त्याचा आवाज आवडला होता. मात्र, इतका चांगला प्रतिसाद मिळूनही त्याला इंडियन आयडॉलच्या टॉप १५ स्पर्धकांमध्ये स्थान मिळवता आले नाही. रितोला शोमधून बाहेर पडावे लागल्याने त्याच्या चाहत्यांनी नाराजी व्यक्त केली होती. मात्र, रितोने या अपयशामुळे खचून न जाता संगीताचा प्रवास सुरू ठेवला.
व्हायरल गाण्याने मिळवलेली नवी उंची
इंडियन आयडॉलमधून बाहेर पडल्यानंतर रितोने स्वतःच्या संगीतावर काम सुरू ठेवले. त्याच्या ‘हीर रांझणा’ या गाण्याला प्ले डीएमएफ या म्युझिक लेबलच्या माध्यमातून रिलीज करण्याची संधी मिळाली. या गाण्याला प्रेक्षकांचा चांगला प्रतिसाद मिळाला आणि रितोला देशभरात ओळख मिळू लागली.
यानंतर त्याने ‘मेरी बनोगी क्या’, ‘इक तू ही है’, ‘बस तेरा’ आणि ‘इबादते’ यांसारखी गाणी रिलीज केली. प्रसिद्ध गायिका श्रेया घोषालसोबत ‘प्यार आता है’ या गाण्यात काम करण्याची संधीही त्याला मिळाली. ईशान खट्टर आणि तारा सुतारिया यांच्या म्युझिक व्हिडीओमुळे या गाण्याचीही चर्चा झाली.
रितो रिबाच्या लोकप्रियतेला सध्या नवी उंची मिळाली आहे. त्याचे ‘दिलरुबा दिलनशीं’ हे गाणे सोशल मीडियावर मोठ्या प्रमाणात व्हायरल होत आहे. या गाण्यात रेट्रो थीममधील रोमँटिक संगीताची झलक आणि आधुनिक संगीताचा सुंदर मिलाफ पाहायला मिळतो. त्यामुळे तरुणांसोबतच जुन्या गाण्यांची आवड असलेल्या श्रोत्यांनाही हे गाणे फार आवडत आहे. या गाण्याला मिळालेल्या लोकप्रियतेचा अंदाज १६ नोव्हेंबर २०२६ पर्यंतच्या आकडेवारीवरून येतो. ‘दिलरुबा दिलनशीं’ने शाझम इंडियाच्या चार्टमध्ये पहिले स्थान, तर स्पॉटिफाय इंडियाच्या डेली चार्टमध्ये चौथे स्थान मिळवले आहे.
Leave a Reply