कॅप्टन अशोक खरात प्रकरणावर आधारित बहुचर्चित ‘महाराष्ट्र एपस्टीन फाईल’ चित्रपटाची प्रदर्शन तारीख पुढे ढकलण्यात आल्याचे समोर आले आहे. २० नोव्हेंबरला हा चित्रपट प्रदर्शित होणार होता. मात्र, चित्रपट प्रदर्शित होऊ नये यासाठी सेन्सॉर बोर्डावर दबाव टाकला जात असल्याचा आरोप अभिनेत्री दिपाली सय्यद यांनी केला आहे. २२ नोव्हेंबरला सेन्सॉर बोर्डासमोर चित्रपटाचे स्क्रीनिंग आहे. सेन्सर सर्टिफिकेट न मिळाल्यास किंवा स्क्रीनिंग न झाल्यास सेन्सॉर बोर्डाच्या कार्यालयासमोर आंदोलन करण्याचा इशारा दिपाली सय्यद यांनी दिला आहे.
प्रदर्शन रखडल्याचा आरोप काय?
चित्रपटात भूमिका असलेल्या दिपाली सय्यद यांनी म्हटले आहे की, सेन्सर बोर्डाला दबावाखाली आणले जात आहे. त्यांच्या म्हणण्यानुसार, स्क्रीनिंगची तारीख सेन्सॉर बोर्डाकडे लागत नाही. हा चित्रपट प्रदर्शित होण्यासाठी त्यांनी विनंती केली आहे की, या चित्रपटाला थांबवू नका. २२ तारखेपर्यंत आम्ही सेन्सर बोर्डाच्या स्क्रीनिंगसाठी थांबलो आहोत. जर अडथळे आले आणि स्क्रीनिंग झाले नाही, तर मी सेन्सर बोर्डाच्या बाहेर आंदोलन करेन, असेही त्यांनी म्हटले आहे.
त्यांच्या दिग्दर्शकाचे म्हणणे आहे की, सीसीटीव्ही तपासून पाहावा. स्क्रीनिंगची वाट पाहिली जाणार आहे. स्क्रीनिंग झाले की मग पुन्हा या चित्रपटाची प्रदर्शन तारीख जाहीर केली जाणार आहे. स्क्रीनिंग झाले नाही, तर आंदोलन केले जाणार असल्याचेही दिपाली सय्यद यांनी म्हटले आहे.
पुढे त्या म्हणाल्या, चित्रपट पूर्ण झाला आहे. चित्रपट करण्याचा निर्णय झाला तेव्हापासून ते आतापर्यंत अडथळे अनेक येत आहेत. कोर्ट कचेरी चालू आहे. प्रदर्शनाच्या आधी सेन्सरचा जो भाग असतो, तिथे आता अडचणी आल्या आहेत. एकेक विषयाला घेऊन त्रास दिला जातो, पण तरी चित्रपट प्रदर्शित होणार असल्याचे त्यांनी सांगितले. अडथळे पार करत आम्ही इथपर्यंत आलो आहोत, असेही त्या म्हणाल्या.
पात्राचे नाव आणि ट्रेडमार्कवर स्पष्टीकरण
ट्रेडमार्कवरून कारवाई होऊ शकत नाही, असे दिपाली सय्यद यांनी स्पष्ट केले. चित्रपटातील पात्र रूपाली चाकणकर यांचे नाही, तर महिला आयोगाच्या त्यावेळच्या अध्यक्षाचा रोल त्यांनी केल्याचे त्यांनी सांगितले. त्यांच्या म्हणण्यानुसार, ट्रेडमार्कचा विषय न्यायप्रविष्ट आहे. ५ नोव्हेंबरला त्यांनी सर्टिफिकेट सादर केले आहे, पण त्याच्या आधी चित्रपटाचे शूटिंग होऊन तो पूर्ण झाला आहे.
ट्रेडमार्क कशावर, साड्यांवर? साडी सगळेच नेसतात. त्यात काही बदल होऊ शकत नाही. राहिली केसांची गोष्ट, असे केस अनेक जणांचे आहेत. प्रश्न राहिला नावाचा, तर रूपाली नाव अनेकांचे आहे. अनेक महिलांची आणि मुलींची रूपाली नावे आहेत. चित्रपटात नाव रूपाली नाही, चैत्राली आहे, असे त्यांनी स्पष्ट केले. महाराष्ट्रात अनेकांनी राजकीय नेत्यांचा रोल केलेला आहे. रोल केल्यानंतर तीच व्यक्ती असते का, असा सवालही त्यांनी केला. त्या म्हणाल्या, मी महिला आयोगाच्या अध्यक्षाचा रोल केला आहे. त्यावेळी तुम्ही महिला आयोगाच्या अध्यक्ष होत्या, तर त्याला मी काय करू? मी राजकीय नेत्याचे काम केले आहे. या सगळ्या प्रकरणादरम्यान जेवढे राजकीय नेते होते, ते सगळे राजकीय नेते या चित्रपटात पाहायला मिळतील, असेही त्यांनी सांगितले.
दिपाली सय्यद यांनी असेही सांगितले की, अडीच-तीन वर्षांपूर्वी त्या अशोक खरात यांना स्वतःच्या कार्यालयात भेटल्या होत्या. त्यावेळी त्यांनी त्यांना चिंचोके आणि ओश्नो जल दिले होते. मात्र, अशा बाबांवर आपला विश्वास नाही, असेही त्यांनी म्हटले आहे. चित्रपटाच्या नावामुळे महाराष्ट्राचे नाव कसे खराब होईल, असा सवाल त्यांनी केला. महाराष्ट्रात जे डाग लागले ते पुसायला नको का? महाराष्ट्रात जे घडले ते दाखवायला नको का? पुन्हा महिलांचे शोषण होऊ नये यासाठी हा प्रयत्न असल्याचे त्यांनी सांगितले. नाव बदलले आणि एपस्टीन फाईल हे नाव राहिले तरी चित्रपट तोच राहणार असल्याचेही त्यांनी म्हटले आहे.
Leave a Reply