भारताचा अनुभवी फिरकीपटू युझवेंद्र चहल याच्या दुसऱ्या इनिंगला सुरुवात झाली आहे. क्रिकेटच्या खेळपट्टीवर आपल्या फिरकीने अनेकांना गुंडाळणाऱ्या चहल याला भारतीय जनता पक्षाकडून मोठी जबाबदारी देण्यात आली आहे. चहल गेल्या अनेक वर्षांपासून भारतीय संघातून बाहेर आहे. त्यामुळे त्याला टीम इंडियात कमबॅकची संधी मिळेल, अशी आशा होती. मात्र, निवड समितीकडून त्याला संधी मिळाली नाही. आता चहलला भाजपच्या एका खास टीममध्ये स्थान मिळाले आहे.
चहलची पहिली प्रतिक्रिया
भाजपकडून शनिवारी २१ नोव्हेंबरला राष्ट्रीय ओबीसी मोर्चाच्या नव्या कार्यकारणीची घोषणा करण्यात आली. भाजपचे राष्ट्रीय अध्यक्ष नितीन नबीन यांनी या नियुक्त्या जाहीर केल्या आहेत. त्यानुसार चहलला भाजपकडून राष्ट्रीय ओबीसी मोर्चाच्या नव्या कार्यकारणीत विशेष आमंत्रित सदस्य करण्यात आले आहे. भाजप ओबीसी मोर्चाच्या सोशल मीडिया अकाउंटवरून याबाबतची माहिती देण्यात आली आहे. मात्र, विशेष आमंत्रित सदस्य म्हणून चहलवर काय जबाबदारी असणार, याबाबत कोणतीही माहिती देण्यात आलेली नाही. जबाबदारी मिळाल्यानंतर चहलने सोशल मीडियावरून पक्षाच्या प्रमुख नेत्यांचे आभार मानले आहेत. भाजप कुटुंबात स्थान आणि मान-सन्मान दिल्याने पंतप्रधान नरेंद्र मोदी, गृहमंत्री अमित शाह, भाजप राष्ट्रीय अध्यक्ष नितीन नबीन आणि ओबीसी मोर्चाचे राष्ट्रीय अध्यक्ष अमरपाल मौर्य यांचे त्याने जाहीर आभार मानले.
चहलची आंतरराष्ट्रीय कारकीर्द
चहलने भारताचे एकदिवसीय आणि टी-२० संघाचे प्रतिनिधित्व केले आहे, तर त्याला कसोटी संघात संधी मिळाली नाही. भारताने रोहित शर्मा याच्या नेतृत्वात २०२४ साली दक्षिण आफ्रिकेला पराभूत करत टी-२० विश्वचषक जिंकला होता आणि चहल त्या विश्वचषक विजेत्या संघाचा सदस्य होता. चहलने २०१६ साली आंतरराष्ट्रीय पदार्पण केले होते. त्याने ११ जून २०१६ रोजी झिम्बाब्वे विरुद्ध एकदिवसीय क्रिकेटमधून पदार्पण केले. एकदिवसीय क्रिकेटमध्ये त्याने एकूण ७२ सामन्यांत १२१ विकेट्स मिळवल्या असून ४२ धावांच्या मोबदल्यात ६ विकेट्स ही त्याची सर्वोत्तम कामगिरी ठरली. २४ जानेवारी २०२३ रोजी न्यूझीलंड विरुद्ध खेळलेला एकदिवसीय सामना त्याच्या कारकीर्दीतील शेवटचा ठरला. टी-२० क्रिकेटमध्येही त्याने झिम्बाब्वे विरुद्धच १८ जून २०१६ रोजी पदार्पण केले. १३ ऑगस्ट २०२३ ला वेस्ट इंडिज विरुद्ध खेळलेला सामना त्याच्या कारकीर्दीतील शेवटचा टी-२० सामना ठरला. टी-२० मध्ये त्याने ८० सामन्यांत ९६ विकेट्स मिळवल्या होत्या.
Leave a Reply