लातूर शहराच्या पाणीप्रश्नावरून राजकीय वातावरण तापले आहे. काँग्रेस नेते अमित देशमुख आणि भाजपचे नवनाथ बन यांच्यात या मुद्द्यावरून आरोप-प्रत्यारोप सुरू झाले असून, रेल्वेने पाणी आणण्याच्या जुन्या मुद्द्यावरून दोन्ही बाजूंनी एकमेकांवर निशाणा साधला जात आहे.
रेल्वेने पाणी हा राजकीय षडयंत्र असल्याचा दावा
अमित देशमुख यांनी लातूरला रेल्वेने पाणी पाठवणे हे तत्कालीन राजकीय षडयंत्र होते, असा दावा केला आहे. त्यांचे म्हणणे आहे की, विलासराव देशमुख मुख्यमंत्री असताना त्यांना पाणीप्रश्न सोडवता आला नाही, असे दाखवण्यासाठी हा अपप्रचार करण्यात आला होता. आता राज्यात भाजपचे सरकार असल्याने रेल्वेने पाणी आणण्याची मागणी करून पाहावी, असे आव्हानही देशमुख यांनी दिले आहे.
काँग्रेसच्या सत्ताकाळावर बन यांचा सवाल
या दाव्यावर भाजपचे नवनाथ बन यांनी तातडीने प्रत्युत्तर दिले आहे. काँग्रेस इतकी वर्षे सत्तेत असताना, लातूर महापालिकेत काँग्रेसचे वर्चस्व असताना आणि अमित देशमुख अनेक वर्षांपासून लातूरचे नेतृत्व करत असताना पिण्याच्या पाण्याचा प्रश्न का सोडवू शकले नाहीत, असा सवाल बन यांनी उपस्थित केला. आज लातूरमध्ये जवळपास महिन्याभराने पाणी येते, असेही त्यांनी नमूद केले. हिंमत असेल तर येणाऱ्या पंचवार्षिक योजनेत लातूर शहराचा पाणीप्रश्न कायमस्वरूपी मिटवावा, असे थेट आव्हान बन यांनी देशमुख यांना दिले आहे.
Leave a Reply