नवी दिल्लीतील पुराणा किल्ला येथे शांघाय सहकार्य संघटनेच्या पहिल्या सभ्यता संवाद मंचाचे उद्घाटन पंतप्रधान नरेंद्र मोदी यांच्या हस्ते करण्यात आले. या तीन दिवसीय परिषदेचे आयोजन २० ते २२ नोव्हेंबरदरम्यान करण्यात आले आहे. या परिषदेनंतर पाकिस्तानचे मंत्री मुसादिक मसूद मलिक भारत दौऱ्यावर येणार आहेत.
या परिषदेत चीन, रशिया, इराण यांच्यासह पाकिस्तानचाही सहभाग आहे. ऑपरेशन सिंदूरनंतर पाकिस्तानचे मंत्री भारतात येणार असल्याने या दौऱ्याकडे विशेष लक्ष लागले आहे. याआधी २०२३ मध्ये पाकिस्तानातून बिलावल भुट्टो भारतात आले होते.
प्राचीन वारशाचे प्रदर्शन
उद्घाटनादरम्यान पंतप्रधान मोदी यांनी पुराणा किल्ला येथे उभारण्यात आलेल्या पुरातत्त्वीय आणि सांस्कृतिक प्रदर्शनांची पाहणी केली. या प्रदर्शनात भारताचा पुरातत्त्वीय, कलात्मक आणि साहित्यिक वारसा मांडण्यात आला आहे. ‘अस्तित्व – हमारे होने का सार’ या प्रदर्शनात इ.स.पूर्व १२०० ते इ.स. १२०० या काळातील दिल्लीच्या आणि भारताच्या प्राचीन वारशाचे पुरावे, उत्खननातील अवशेष, कलाकृती आणि स्थापत्यखंड सादर करण्यात आले आहेत.
पुराणा किल्ला येथील उत्खनन स्थळाभोवती उभारलेली ही मांडणी भारताचा प्राचीन इतिहास आणि एससीओ देशांशी असलेले ऐतिहासिक व सांस्कृतिक संबंध दर्शवते. यामध्ये इ.स. १३२८ मधील इंद्रप्रस्थ संदर्भातील शिलालेख, पेंटेड ग्रे वेअर मातीची भांडी आणि अश्वमेध विधीशी संबंधित पुरातत्त्वीय नमुने यांचा समावेश आहे. महाभारत स्क्रॉल पॅव्हेलियन ‘अनंत’ मध्ये १८ व्या शतकातील दुर्मिळ चित्रित महाभारत स्क्रोल पाहण्यासाठी ठेवण्यात आला आहे. मौर्यकालीन मातीच्या मूर्ती आणि राजपूत काळातील वैकुंठ विष्णूची दगडी मूर्तीही या प्रदर्शनात मांडण्यात आली आहे.
संवादातून संबंध सुधारण्याची अपेक्षा
पाकिस्तानच्या मंत्र्यांच्या भारत दौऱ्याबाबत नॅशनल कॉन्फरन्सचे नेते सलमान अली सागर यांनी सकारात्मक प्रतिक्रिया दिली आहे. अशा भेटींमुळे जम्मू-काश्मीरच्या जनतेला फायदा होईल, अशी अपेक्षा त्यांनी व्यक्त केली. सांस्कृतिक देवाणघेवाण आणि राजकीय संवादातून दोन्ही देशांमधील संबंध अधिक संतुलित होऊ शकतील, असेही त्यांनी म्हटले आहे. २० नोव्हेंबर रोजी दिल्लीत होणारी ही बैठक फलदायी ठरेल, अशी आशा त्यांनी व्यक्त केली.
Leave a Reply