हिवाळ्याच्या दिवसांत लग्न, स्वागत समारंभ किंवा एखाद्या कार्यक्रमाला जायचे असेल, तर साडीवर कोणता लूक करायचा हे ठरवणे अनेकांसाठी अवघड जाते. कडाक्याची थंडी आणि स्टाइल या दोन्हींचा मेळ घालायचा असेल, तर ब्लाउजची निवड योग्य असायला हवी. काही सोप्या कल्पना वापरल्या, तर थंडीपासून संरक्षण मिळवतानाच दिसणेही आकर्षक ठरू शकते.
मखमली कापड आणि पूर्ण बाह्या
हिवाळ्यासाठी मखमली कापड हा उत्तम पर्याय मानला जातो. या कापडामुळे एक वेगळाच शाहीपणा येतो आणि थंडीपासूनही संरक्षण मिळते. पूर्ण बाह्यांचा आणि गोल गळ्याचा ब्लाउज शिवून घेतल्यास तो अनेक साड्यांवर चांगला दिसतो. काळ्या रंगाचा मखमली ब्लाउज वेगवेगळ्या रंगांच्या साड्यांसोबत घालता येतो, त्यामुळे एकाच ब्लाउजचे अनेक उपयोग होतात.
जॅकेट आणि श्रगची साथ
हिवाळ्यात साडीवर लांब जॅकेट घालण्याची कल्पनाही छान ठरू शकते. वेगवेगळ्या रंगांत मखमली किंवा ब्रोकेड कापडाची जॅकेटे मिळतात. ती साडीवर घातल्यास लूक पूर्णपणे बदलतो. क्रीम रंगाच्या साडीवर नारंगी कॉलर असलेला श्रग घातल्यास त्याला एक शाही झाक येते.
मॅचिंग ब्लाउज आणि बोट नेक
साडीशी मिळताजुळता पूर्ण बाह्यांचा ब्लाउज शिवून त्यावर तसाच जॅकेट घातल्यास लूक वेगळा आणि दर्जेदार दिसतो. ब्रोकेड किंवा भरतकाम असलेली साडी असेल, तर तिच्यासोबत बोट नेक असलेला पूर्ण बाह्यांचा ब्लाउज चांगला दिसतो. यामुळे थंडीपासूनही बचाव होतो. हवे असल्यास बाह्या चुडीदार शिवून त्यावर सिक्वेन्सचे भरतकाम केल्यास ब्लाउज आणखी सुंदर दिसतो.
पेप्लम स्टाइलचा ब्लाउज
पेप्लम स्टाइलचा ब्लाउजही हिवाळ्यासाठी चांगला पर्याय आहे. कॉलर असलेल्या या ब्लाउजची कंबरपट्टी घेरदार असते आणि त्याला अर्ध्या बाह्या असतात. मखमली कापडात शिवलेला असा ब्लाउज विशेष उठून दिसतो.
थंडीच्या मोसमात साडी नेसताना ब्लाउजच्या कापडाची आणि शैलीची निवड नीट केल्यास कार्यक्रमात आराम आणि स्टाइल दोन्ही मिळवता येतात.
Leave a Reply