उत्तर प्रदेशातील राजकारण पुन्हा एकदा तापले आहे. आगामी विधानसभा निवडणुकीच्या पार्श्वभूमीवर विविध पक्षांच्या नेत्यांमध्ये आरोप-प्रत्यारोपांची मालिका सुरू झाली आहे. या वातावरणात अयोध्येचे खासदार आणि समाजवादी पक्षाचे नेते अवधेश प्रसाद यांनी एक मोठा दावा केला आहे.
प्रसाद यांच्या मते, २०२७ मध्ये होणाऱ्या विधानसभा निवडणुकीत समाजवादी पक्ष ३०० हून अधिक जागा जिंकेल. योगी आदित्यनाथ यांच्या नेतृत्वाखालील सरकारने जनतेचा विश्वास गमावला असून लोकांचा भाजपवर आता विश्वास राहिलेला नाही, असे त्यांनी म्हटले आहे. समाजवादी पक्ष ऐतिहासिक विजय मिळवेल, असा त्यांचा दावा आहे.
२०२४ मध्ये झालेल्या लोकसभा निवडणुकीत जनतेने भाजपला धक्का दिला होता, याची आठवणही प्रसाद यांनी करून दिली. त्यांच्या मते, २०२७ च्या विधानसभा निवडणुकीतही जनता भाजपला धक्का देईल.
आजम खान यांच्या जामिनाचा परिणाम
समाजवादी पक्षाचे नेते आजम खान यांची जामिनावर सुटका झाली आहे. याचा उत्तर प्रदेशच्या निवडणुकीवर परिणाम होण्याची शक्यता वर्तवली जात आहे. प्रसाद यांनी या निर्णयाचे स्वागत केले असून, यंदा उत्तर प्रदेशातील मतदारांनी अखिलेश यादव यांच्यावर विश्वास ठेवला असल्याचे त्यांनी म्हटले आहे.
२०२२ च्या निकालाची पार्श्वभूमी
दरम्यान, निवडणुकीच्या पार्श्वभूमीवर सर्व राजकीय पक्षांनी तयारी सुरू केली आहे. भाजप तिसऱ्यांदा सरकार स्थापन करण्याच्या प्रयत्नात आहे, तर समाजवादी पक्ष सत्तेत परतण्याच्या विचारात आहे.
२०२२ मध्ये झालेल्या विधानसभा निवडणुकीत भाजपने दुसऱ्यांदा विजय मिळवत सत्ता स्थापन केली होती. उत्तर प्रदेशातील एकूण ४०३ जागांपैकी भाजपने एकट्याने २५५ जागा जिंकल्या होत्या. मित्रपक्ष अपना दलाला १२ आणि निषाद पक्षाला ६ जागा मिळाल्या होत्या. भाजपच्या नेतृत्वाखालील युतीने एकूण २७३ जागा जिंकल्या होत्या. समाजवादी पक्षाने १११ जागा जिंकून दुसऱ्या क्रमांकाचा पक्ष ठरला होता. राष्ट्रीय लोक दलाला ८ आणि सुहेलदेव भारतीय समाज पक्षाला ६ जागा मिळाल्या होत्या. समाजवादी पक्षाच्या नेतृत्वाखालील युतीने एकूण १२५ जागा जिंकल्या होत्या.
Leave a Reply