मराठा आरक्षण आंदोलक मनोज जरांगे पाटील यांनी पुन्हा एकदा सरकारवर गंभीर आरोप केले आहेत. काही दिवसांपूर्वी त्यांनी एक ऑडिओ क्लिप ऐकवली होती. त्या क्लिपमध्ये एकनाथ शिंदे यांनी भाजपकडून पाचशे कोटी रुपये घेतल्याचा आणि ते श्रीकांत शिंदे यांच्यामार्फत जरांगे यांना देण्यासाठी पाठवल्याचा उल्लेख असल्याचा दावा जरांगे यांनी केला होता. ही क्लिप समोर येताच राज्यभरात मोठी खळबळ उडाली होती. त्यानंतर आता बोलताना जरांगे पाटील यांनी आणखी एक मोठा दावा केला आहे. या दाव्यामुळे पुन्हा एकदा चर्चेला उधाण आले आहे.
चौकशी होणारच नाही, जरांगेंचा आरोप
जरांगे म्हणाले, माझ्या माहितीप्रमाणे त्या ऑडिओ क्लिपची चौकशी होणारच नाही आणि ते करणारही नाहीत, कारण त्यामध्ये भाजपचे लोक आहेत. त्यांच्यावर कारवाई केली तर भाजप मराठ्यातून संपेल आणि नाही केली तर मराठे शिंदे साहेबांपासून दूर जातील, असे त्यांचे म्हणणे आहे. सामान्य लोक असते तर आधी गुन्हे दाखल करून अटक केली असती आणि त्यानंतर एसआयटी नेमली असती, असेही ते म्हणाले. मात्र इथे सगळे उलट झाले. आधी एसआयटी नेमली गेली, कारवाई केली नाही, गुन्हे दाखल केले नाहीत. याचाच अर्थ त्यांच्या पक्षातील लोकांना वाचवायचे आहे, असा आरोप जरांगे यांनी केला आहे.
क्लिप बाहेर कशी गेली, हाच धक्का
जरांगे यांच्या मते, संबंधितांमध्ये खासगीत चर्चा आहे की पैशाचे काहीही होवो, मात्र ही क्लिप बाहेर गेली कशी, हाच त्यांना खूप मोठा धक्का बसला आहे. त्यामुळे या प्रकरणावरून राजकीय वातावरण आणखी तापले आहे.
पुरावे थेट मुख्यमंत्र्यांना देणार
सरकारने आपल्याविरोधात बोलणाऱ्यांना पैसे देण्याची नवी मोहीम सुरू केल्याचा आरोपही जरांगे यांनी केला. या सगळ्या गोष्टींचे पुरावे आपण मुख्यमंत्र्यांना देणार असल्याचे त्यांनी सांगितले. त्यामुळे अजून काहीतरी घडणार असल्याचे संकेत त्यांनी दिले. सरकार यावर काय प्रतिक्रिया देते, हे पाहणे आता महत्त्वाचे ठरणार आहे.
Leave a Reply