येवला येथे विंचूर चौफुली परिसरात वाढलेल्या अतिक्रमणामुळे सातत्याने वाहतूक कोंडी होत होती. तसेच महामार्गाचे रुंदीकरणही सुरू आहे. या पार्श्वभूमीवर बुधवारी नगरपालिका व सार्वजनिक बांधकाम विभागाच्या वतीने पोलिस बंदोबस्तात सुमारे ४० अतिक्रमणे जमीनदोस्त करण्यात आली. ओटे, शेड तसेच पक्क्या बांधकामावर बुलडोझर फिरवण्यात आला.
साडेचार तासांची संयुक्त मोहीम
शहरातून जाणाऱ्या नगर-मनमाड आणि नाशिक-संभाजीनगर महामार्गावर प्रशासनाने संयुक्त अतिक्रमण हटाव मोहीम राबवली. ही मोहीम साडेचार तास चालली. विंचूर चौफुली ते शिवसृष्टी या मार्गावरील रस्त्याच्या दुतर्फा असलेली सुमारे ३० अतिक्रमणे हटविण्यात आली. तर बसस्थानक ते विंचूर चौफुली या मार्गावरील १० ते १५ अतिक्रमणे हटवली. बसस्थानक ते विंचूर चौफुली हा अत्यंत वर्दळीचा मार्ग असून, दुकानदारांचे अतिक्रमण, रस्त्यालगत लावण्यात येणारी वाहने आणि इतर अडथळ्यांमुळे नागरिकांना व वाहनधारकांना मोठ्या प्रमाणात वाहतूक कोंडीचा सामना करावा लागत होता.
पुन्हा अतिक्रमण केल्यास कारवाई
पालिका मुख्याधिकारी तुषार आहेर, पोलीस निरीक्षक संदीप मंडलीक आणि सार्वजनिक बांधकाम विभागाचे अभियंता यांच्या नेतृत्वाखाली पालिकेचे ४० कर्मचारी, ३० पोलीस आणि सार्वजनिक बांधकाम विभागाचे १० कर्मचारी या मोहिमेत सहभागी झाले होते. दोन जेसीबी आणि तीन ट्रॅक्टरही मोहिमेत वापरण्यात आले. मोठ्या प्रमाणात पोलिस असल्याने मोहीम यशस्वीपणे पार पडली. अनेकदा अतिक्रमण हटाव मोहीम राबवूनही व्यापारी फुटपाथच्या बाहेर येऊन पुन्हा अतिक्रमण करत असल्याचे आहेर यांनी सांगितले. यानंतर व्यावसायिकांनी पुन्हा अतिक्रमणे केल्यास त्यांच्यावर कायदेशीर कारवाई केली जाईल, असा इशारा त्यांनी दिला. वाहतूक व्यवस्था सुरळीत राहावी, पादचाऱ्यांना सुरक्षितपणे मार्गक्रमण करता यावे आणि आपत्कालीन वाहनांना अडथळ्याविना मार्ग उपलब्ध व्हावा, हा या मोहिमेचा मुख्य उद्देश आहे.
Leave a Reply