पंढरपूर : कार्तिकी यात्रेच्या तयारीचा आढावा घेण्यासाठी जिल्हाधिकारी एस. कार्तिकेयन यांनी बुधवारी पंढरपूरमधील विविध ठिकाणांची पाहणी केली. यात्रेच्या काळात भाविकांना आवश्यक सोयी-सुविधा वेळेत मिळाव्यात, यासाठी स्वच्छता, पाणीपुरवठा, वाहतूक आणि सुरक्षिततेची कामे तातडीने पूर्ण करण्याचे निर्देश त्यांनी संबंधित विभागांना दिले.
कार्तिकी शुद्ध एकादशी २१ नोव्हेंबर रोजी असून, यात्रेचा कालावधी १० ते २४ नोव्हेंबर असा आहे. या काळात राज्याच्या विविध भागांतून मोठ्या संख्येने वारकरी आणि भाविक पंढरपुरात दाखल होतात. त्यामुळे प्रशासनाने प्रत्यक्ष स्थळपाहणी करून व्यवस्थेची माहिती घेतली.
चंद्रभागा घाट आणि वाळवंटातील व्यवस्था
चंद्रभागा नदीपात्र आणि घाट परिसरात स्वच्छता कायम राखण्यासाठी अतिरिक्त स्वच्छता कर्मचारी नियुक्त करण्याच्या सूचना जिल्हाधिकाऱ्यांनी दिल्या. नदीकाठावरील काटेरी झाडे-झुडपे काढावीत, घाटांवरील माती हटवून घाट स्वच्छ धुऊन घ्यावेत आणि घाटांच्या कोपऱ्यांमध्ये साचलेला कचरा तातडीने हटवावा, असे त्यांनी सांगितले. नदीपात्रात वाहनांचा प्रवेश रोखण्यासाठी प्रतिबंधात्मक उपाययोजना करण्याचेही निर्देश देण्यात आले. वाळवंटात खाद्यपदार्थ आणि माळा विक्री करणाऱ्या व्यावसायिकांमुळे अतिक्रमण होणार नाही, याची दक्षता घेण्यास सांगण्यात आले.
भक्तीसागर परिसरात दिंड्यांसोबत येणारे वारकरी आणि भाविक मोठ्या संख्येने वास्तव्यास असतात. त्यांच्या सोयीसाठी नदीपात्रात ये-जा करण्यासाठी तयार करण्यात आलेल्या तात्पुरत्या घाटाचे मुरुमीकरण आणि सपाटीकरण तातडीने पूर्ण करावे, अशा सूचना देण्यात आल्या.
जनावरांच्या बाजारात पाणी आणि पशुवैद्यकीय सेवा
वाखरी पालखी तळावर कार्तिकी यात्रेनिमित्त मोठ्या प्रमाणात जनावरांचा बाजार भरतो. या ठिकाणी जनावरे आणि पशुपालकांसाठी पिण्याच्या पाण्याची व्यवस्था करावी. जनावरांवरील उपचारांसाठी २४ तास पशुवैद्यकीय पथक कार्यरत ठेवावे, असे निर्देशही जिल्हाधिकाऱ्यांनी दिले.
सरगम चौक येथे राष्ट्रीय महामार्ग प्राधिकरणाचे काम सुरू असल्याने वाहतुकीला अडथळा निर्माण होण्याची शक्यता आहे. त्यामुळे महामार्ग प्राधिकरणाने आवश्यक उपाययोजना करून वाहतूक सुरळीत राहील, याची दक्षता घ्यावी, असे जिल्हाधिकाऱ्यांनी सांगितले.
या वेळी नगराध्यक्षा प्रणिती भालके यांनी चंद्रभागा वाळवंटात महिलांसाठी चेंजिंग रूमची संख्या वाढविणे आणि परिसरात वेळोवेळी जंतुनाशक फवारणी करण्याची सूचना केली. या पाहणीवेळी नगराध्यक्षा प्रणिती भालके, प्रांताधिकारी सचिन इथापे, उपविभागीय पोलिस अधिकारी सीताराम डुबल, कार्यकारी अभियंता अमित निमकर, तहसीलदार सचिन लंगुटे, मुख्याधिकारी महेश रोकडे, राष्ट्रीय महामार्ग प्राधिकरणाचे अभिजीत औटी आदी उपस्थित होते.
Leave a Reply