मराठी मनोरंजन विश्वातील लोकप्रिय अभिनेते अविनाश नारकर आणि अभिनेत्री ऐश्वर्या नारकर ही जोडी नेहमीच चर्चेत असते. अभिनयासोबतच सोशल मीडियावरील रिल्समुळेही दोघे प्रेक्षकांच्या पसंतीस उतरले आहेत. मात्र, नुकत्याच दिलेल्या एका मुलाखतीत अविनाश नारकर यांनी आपल्या वैयक्तिक आयुष्यातील असा प्रसंग सांगितला, जो ऐकून कोणाच्याही डोळ्यांत पाणी येईल. वडिलांच्या निधनानंतर घरात घडलेला तो प्रसंग आणि आईच्या तोंडून निघालेले शब्द आजही त्यांच्या मनात घर करून आहेत.
पहाटे झोपेतच वडिलांचे निधन
अविनाश नारकर यांनी सांगितले की, पहाटेच्या सुमारास त्यांच्या वडिलांचे झोपेतच निधन झाले होते. त्यावेळी काही मित्र त्यांना शोधत आले. एका मित्राने त्यांना सांगितले की, तात्यांना रुग्णालयात दाखल केले आहे. हे ऐकताच अविनाश यांना मोठा धक्का बसला आणि ते मित्रांसोबत निघाले. मात्र, मित्र त्यांना रुग्णालयात न नेता घरी घेऊन गेले. यामागचे कारण विचारल्यावर आधी आईला भेटून ये, असे मित्रांनी सांगितले. अविनाश नारकर जेव्हा आपल्या चाळीतील घरात पोहोचले, तेव्हा समोरचे दृश्य पाहून त्यांना मोठा धक्का बसला.
आईचे शब्द ऐकून खचले
त्या दिवसाची आठवण सांगताना अविनाश म्हणाले की, त्यावेळी त्यांचे एकाच खोलीचे घर होते. घरात प्रवेश करताच समोर वडिलांचे पार्थिव ठेवलेले होते आणि बाजूला आई बसली होती. अविनाश यांना पाहताच आईने हंबरडा फोडला आणि ती ढसाढसा रडू लागली. त्यावेळी आई म्हणाली, आता माझ्या अविची बक्षिसे कुणाला दाखवू? आईचे हे शब्द ऐकून अविनाश पूर्णपणे खचले. वडिलांच्या निधनाचे दुःख तर होतेच, पण आईच्या या एका वाक्याने त्यांना वडिलांच्या मनात आपल्याबद्दल किती प्रेम होते, याची जाणीव झाली.
अविनाश यांनी सांगितले की, त्यांचे वडील त्यांचे कधीही उघडपणे कौतुक करत नसत. त्यांच्या पाठीवर थाप मारून शाबासकी देण्याचीही त्यांची सवय नव्हती. त्यामुळे वडिलांना आपल्या यशाचे किती कौतुक वाटत असेल, याची त्यांना कल्पना नव्हती. मात्र, त्या दिवशी आईच्या बोलण्यातून त्यांना वेगळीच गोष्ट समजली. अविनाश यांना मिळालेली बक्षिसे आई वडिलांना दाखवत असे आणि दोघांमध्ये त्यांच्या यशाबद्दल चर्चा होत असे. वडील थेट काही बोलत नसले, तरी मुलाच्या कामगिरीचा त्यांना अभिमान होता. हे समजल्यानंतर अविनाश अधिकच भावूक झाले.
वडिलांसोबतचा आणखी एक खास प्रसंग सांगताना अविनाश म्हणाले की, त्यांचा वडिलांशी फारसा संवाद होत नसे. मात्र, आठवी, नववी आणि दहावीपर्यंत ते वडिलांच्या जवळ झोपायचे. त्यांच्या केसांना तेल लावून मालिश केल्याशिवाय बाबा कधीच झोपत नसत. वडिलांच्या प्रेमाची ही छोटीशी आठवण आजही त्यांच्या मनात कायम आहे. वडील व्यक्त होण्यात कमी असले तरी त्यांचे मुलावर किती प्रेम होते, हे अविनाश यांना आईच्या त्या एका वाक्यातून उमगले.
Leave a Reply