धुळे जिल्ह्यात पहाटेच्या वेळी मॉर्निंग वॉकसाठी घराबाहेर पडलेल्या दोन नागरिकांचा वेगवेगळ्या अपघातांत मृत्यू झाला आहे. गोंदूर आणि लामकानी परिसरात पहाटे सहा ते सातच्या दरम्यान पायी चालत असताना वाहनांच्या धडकेने हे दोघेही बळी पडले. स्वतःची कोणतीही चूक नसताना केवळ अंधार आणि भरधाव वाहनांमुळे त्यांना जीव गमवावा लागल्याने परिसरात शोककळा पसरली आहे.
गोंदूर येथील घटना
पहिल्या घटनेत गोंदूर येथील बांधकाम व्यावसायिक अनिल पाटील शनिवारी, १४ तारखेला पहाटे पायी चालत असताना अंधारात अज्ञात वाहनाने त्यांना धडक दिली. या अपघातात त्यांचा मृत्यू झाला. त्यांच्या निधनाने बांधकाम क्षेत्रासह गोंदूर परिसरात हळहळ व्यक्त होत आहे.
पत्रकाराचा मृत्यू
गोंदूर येथील घटना ताजी असतानाच लामकानी येथे अशीच घटना घडली. यात पत्रकार तथा देवेंद्र कृषी सेवा केंद्राचे कर्मचारी ठाणसिंग उपाख्य वना पहाडसिंग राऊळ (वय ४९) यांचा मालवाहू वाहनाच्या धडकेत जागीच मृत्यू झाला. ही घटना मंगळवारी, १७ तारखेला पहाटे पाच ते सहाच्या दरम्यान लामकानी-निजामपूर रस्त्यावरील महावीर किराणा दुकानासमोर घडली. अपघातानंतर वाहनचालक वाहनासह पसार झाला. वना राऊळ यांच्यावर सायंकाळी पाचला लामकानीत शोकाकूल वातावरणात अंत्यसंस्कार झाले.
पहाटे चालताना काळजी घ्या
सध्या हिवाळ्याचे दिवस असल्याने पहाटे रस्त्यावर अंधार आणि धुके असते. या वेळेत महामार्गावर तसेच अंतर्गत रस्त्यांवर अवजड व इतर वाहनांची वर्दळ असते. अंधारामुळे रस्त्याच्या कडेने चालणारे पादचारी वाहनचालकांना लवकर दिसत नसल्याने हे जीवघेणे अपघात घडत आहेत. त्यामुळे नागरिकांनी दाट अंधारात मॉर्निंग वॉकला जाणे टाळावे. पहाटे चालताना गडद रंगाचे कपडे टाळून पांढरे, पिवळे किंवा चमकणारे पट्टे असलेले कपडे अथवा जॅकेट वापरावेत, जेणेकरून वाहनचालकांना लांबूनच अंदाज येईल. नेहमी वाहतुकीच्या विरुद्ध दिशेने, म्हणजेच येणारी वाहने दिसतील अशा बाजूने आणि मुख्य डांबरी रस्त्यापासून सुरक्षित अंतरावर चालावे. चालताना मोबाईल वापरणे आणि कानात इअरफोन्स घालणे टाळावे, जेणेकरून मागून येणाऱ्या वाहनांचा आवाज स्पष्ट ऐकू येईल आणि संभाव्य अपघात टाळता येतील.
Leave a Reply