बॉलिवूडचे महानायक अमिताभ बच्चन सध्या ‘कौन बनेगा करोडपती १८’ या लोकप्रिय कार्यक्रमाचे सूत्रसंचालन करत आहेत. या कार्यक्रमाच्या नुकत्याच प्रसारित झालेल्या भागात त्यांनी आपल्या आयुष्यातील एक थरारक अनुभव सांगितला. नेपाळमध्ये चित्रपटाचे शूटिंग करत असताना कयाकिंगचा आनंद घेणे त्यांना चांगलेच महागात पडले होते. या साहसी खेळादरम्यान त्यांची बोट उलटली आणि ते पाण्यात बुडता बुडता वाचले होते.
## बोटीत बसायलाच ४५ मिनिटे
अमिताभ बच्चन एका चित्रपटाच्या शूटिंगसाठी नेपाळमध्ये गेले होते. त्यावेळी तिथे उपस्थित असलेल्या एका व्यक्तीने त्यांना कयाकिंग करण्याचा सल्ला दिला. हा अनुभव अतिशय सुंदर असल्याचेही त्यांना सांगण्यात आले. सुरुवातीला मात्र अमिताभ यांनी कयाकिंग करण्यास नकार दिला होता. कारण कयाक ही बोट अतिशय अरुंद असल्यामुळे त्यात बसणेसुद्धा त्यांच्यासाठी कठीण ठरत होते. त्यांना या बोटीत व्यवस्थित बसण्यासाठी जवळपास ४५ मिनिटे प्रयत्न करावे लागले. अखेर त्यांनी कयाकिंग करण्याचा निर्णय घेतला. मात्र, यावेळी ते बुडाले होते आणि त्यांचा जीव थोडक्यात वाचला.
## पाण्याखाली हात हलवून सुटका
अमिताभ बच्चन म्हणाले की, कयाकिंग करताना योग्य दिशेने पॅडल मारणे आवश्यक असते. त्यांना बोट एका दिशेने वळवायची होती, पण त्यांनी ती दुसऱ्याच दिशेने वळवली आणि बोट उलटली. अशा वेळी पाण्याखाली असताना हात वरच्या दिशेने ढकलले, तर बोट पुन्हा सरळ होईल, असे त्यांना आधी सांगण्यात आले होते. तरीही बोट सरळ झाली नाही, तर दोन्ही हात पाण्याखाली जोरजोरात हलवायचे, जेणेकरून आजूबाजूच्या लोकांना कोणीतरी बुडत असल्याचे लक्षात येईल. त्यामुळे त्यांनी बाहेर पडण्याचा प्रयत्न करत पाण्याखाली दोन्ही हात जोरजोरात हलवले होते. कारण माणूस फार वेळ श्वास रोखून धरू शकत नाही.
दरम्यान, अमिताभ बच्चन यांच्या प्रकृतीविषयक कारणांमुळे काही काळ ‘कौन बनेगा करोडपती १८’चे जुने भाग प्रसारित केले जात होते. मात्र, सोमवारी नव्या स्पर्धकांसह कार्यक्रम पुन्हा सुरू झाला. याच भागात एका स्पर्धकाशी संवाद साधताना अमिताभ यांनी नेपाळमधील हा धक्कादायक अनुभव सांगितला.
Leave a Reply