स्वयंपाकघरात गॅस पेटवण्यासाठी लायटरचा रोज वापर होतो. मात्र काही दिवसांनी तो खराब होऊ लागतो. जेवण बनवताना उडणारे तेल, मसाले आणि ओले हात लागल्याने लायटर चिकट आणि खराब होतो. अनेकदा चिकट, ओल्या झालेल्या लायटरला हात लावणेही नकोसे वाटते. लायटरच्या आतमध्ये ठिणगी निर्माण करणारी स्प्रिंगची यंत्रणा आणि गॅस असतो. त्यामुळे लायटर पाण्याने धुतल्यास मोठा धोका निर्माण होऊ शकतो. मात्र पाण्याचा वापर न करता घरच्या घरी सोप्या पद्धतीने तो स्वच्छ करता येतो.
लायटर स्वच्छ करण्याच्या सोप्या पद्धती
पहिली पद्धत म्हणजे सौम्य साबण किंवा डिटर्जंटचा वापर. मऊ सुती कापड ओले करून त्यावर थोडासा साबण किंवा लिक्विड डिटर्जंट लावा आणि लायटरचा बाहेरील भाग नीट पुसून घ्या. यामुळे लायटरवरील तेलकटपणा आणि चिकटपणा लगेच निघून जातो. दुसरी पद्धत म्हणजे रबिंग अल्कोहोलचा वापर. रबिंग अल्कोहोल हा लायटर स्वच्छ करण्यासाठी सुरक्षित पर्याय आहे. अल्कोहोल हवेच्या संपर्कात येताच लगेच सुकते, त्यामुळे लायटरच्या आत ओलावा जात नाही. कापसावर किंवा कापडावर थोडे रबिंग अल्कोहोल घेऊन लायटर स्वच्छ करावा. तिसरी पद्धत म्हणजे बेकिंग सोड्याचा उपाय. लायटरवर हळदीचे, तेलाचे किंवा मसाल्यांचे हट्टी डाग असतील तर त्यावर बेकिंग सोडा टाका आणि हलक्या हाताने घासा. त्यानंतर एका स्वच्छ, कोरड्या कापडाने लायटर पुसून घ्या. लायटर अगदी नव्यासारखा चमकेल.
स्वच्छ करताना घ्यावयाची काळजी
लायटर स्वच्छ करण्यापूर्वी त्याची ज्योत पूर्णपणे विझलेली आहे की नाही हे तपासा. तसेच लायटर थंड झाले आहे याची खात्री करा. स्वच्छ करण्यासाठी वापरणारे कापड जास्त ओले करू नका. ते घट्ट पिळून घ्या, जेणेकरून पाण्याचे थेंब लायटरच्या आत जाणार नाहीत. लायटर स्वच्छ केल्यानंतर लगेच गॅस पेटवण्यासाठी वापरू नका. काही मिनिटे कोरड्या हवेत पूर्णपणे सुकू द्या.
Leave a Reply