निरोगी राहण्यासाठी रोज दहा हजार पावले चाललीच पाहिजेत, असे अनेकांना वाटते. मात्र हा आकडा डॉक्टरांनी ठरवलेला नाही. एकोणिसशे साठच्या दशकात जपानमध्ये चालण्याचे महत्त्व पटवून देण्यासाठी एका कंपनीने पावले मोजणाऱ्या यंत्राची जाहिरात केली. त्यातून दहा हजार पावलांचा आकडा लोकप्रिय झाला आणि पुढे जगभरातील लोक हा नियम पाळू लागले. प्रत्यक्षात रोज सात हजार पावले चालणेही शरीरासाठी फायदेशीर ठरते. त्यामुळे हृदय निरोगी राहण्यास आणि आजारांचा धोका कमी होण्यास मदत होते.
वयानुसार किती पावले चालावीत?
तरुण व्यक्ती रोज आठ ते दहा हजार पावले चालू शकतात. चाळीस ते साठ या वयोगटातील व्यक्तींनी रोज सात ते नऊ हजार पावले चालण्याचा प्रयत्न करावा. साठ वर्षांवरील व्यक्तींनी शरीराच्या क्षमतेनुसार सहा ते आठ हजार पावले चालावीत. ज्यांना चालण्याची सवयच नाही, त्यांनी सुरुवातीला तीन ते चार हजार पावलांपासून सुरुवात करावी. दररोज चालल्याने शरीर निरोगी आणि तंदुरुस्त राहण्यास मदत होते. हृदय निरोगी राहते, वजन नियंत्रणात राहण्यास मदत होते, रक्तातील साखर नियंत्रणात राहते, तणाव कमी होतो आणि रात्री चांगली झोप लागते.
चालताना या गोष्टी लक्षात ठेवा
चालण्याची सवय नसेल तर सुरुवातीलाच दहा हजार पावले चालण्याचा प्रयत्न करू नका. त्यामुळे थकवा आणि पाय दुखण्याची समस्या होऊ शकते. सुरुवातीला कमी पावले चाला आणि हळूहळू रोज पाचशे ते एक हजार पावले वाढवा. चालण्यासाठी आरामदायी शूज वापरा, पुरेसे पाणी प्या, सुरुवातीला हळू चाला आणि नंतर वेग वाढवा. रोज ठरावीक वेळी चालण्याची सवय लावा, दिवसभर एकाच जागी बसून राहू नका आणि सकाळी किंवा संध्याकाळी चालण्यासाठी वेळ काढा. निरोगी राहण्यासाठी दहा हजार पावलांचा आकडा गाठण्यापेक्षा दररोज थोडा वेळ चालणे जास्त महत्त्वाचे आहे. हृदयविकार किंवा सांधेदुखीचा त्रास असेल तर डॉक्टरांचा सल्ला घ्यावा.
Leave a Reply